Mizo Students Union (MSU) chuan School Education minister Lalchhandama Ralte hnenah, primary school zirtirtu 817 leh middle school zirtirtu 64 lakna written test tel loa sorkarin kalpui a tum chu an duh loh thu leh written exam neih ngei an duh thu an thlen.

MSU hruaitute hian July 22, Thawhṭanni khan minister Lal­chhandama Rate chu a pisaah an hmu a; zirtirtu lak dan tura an duh dan an thlenah thu mûm nei thei loin an inṭhaṭhen tih MSU hruaitute chuan an sawi.

MSU-in Minister hnena an lehkha thehluhah chuan, written test tel loa sorkarin zirtirtu a lak tur chuan Mizo ṭhalai hna zawng mekteah nghawng ṭha lo tak a neih theih dawn avangin an dodal tlat tih an tarlang.

Lehkhaah chuan, ram leh hnam hmasawnna chu zirnaah thui tak a innghah avangin, ram nghahfâk zirna ṭha Mizoramin a neih theihna tura a innghahna bul thûm - elementary school-ah zirtirtu atana tling ngei lak a 

ṭul thu an tarlang a, "Zirtirtu hna zahawm leh pawimawh tak chu dan pangngai taka lak ngei ni se tih hi kan thupui ber a ni," an ti.

Quality education chung­chang ziakin MSU chuan, "Mizoramah quality education kalpui tum a nih mek laia zirtirtu lak dan turah quality recruitment process kalpui a nih si loh chuan ram leh hnam, zirlaiteah nasa takin nghawng ṭha lo a nei dawn a ni," an ti a; state sorkar leh central sorkarah te, thil dangahte pawh a thiam leh tling zawn nan written exam chu thil pawimawh ber a nih thu an tarlang.

MSU chuan, an ngennate chu ngai pawimawh turin minister Lalchhandama Ralte an ngen a; an ngennain ngaih pawimawh a hlawh loh chuan a tàwp thlenga hmalak an tum thu an tarlang tel bawk.

Zirtirtu lak dan chungchang hi MSU chuan nimin khan an pawl meeting-ah an ngaihtuah chhunzawm a; an hmalak mek­na leh hmalak zel dan turte puangzar turin vawiin hian press conference neih an tum.

MSU chuan, "Ṭhalaite leh zirlaite tan MSU chuan hma a la zel dawn a, kan hmalak mek­na hi zirlaite leh ṭhalaite tana thil pawimawih a ni tih min hriatpui a, min thláwp tlat turin mipui zawng zawng kan sawm a ni," an ti.

Share this Post