Assembly session, digital hmanga kalpui theihna tur National e-Vidhan Application (NEVA) chungchang inhrilhhriatna ni hnih awh tur chu nimin khan Assembly Annexe conference hall-ah ṭan a ni a, Assembly speaker Lalrinliana Sailo-in 

a hawng.

Lalrinliana Sailo chuan, khawvel thiamna sang zel mila ram rorelna kalpui a ni tur chu lawmawm a tih thu sawiin, "Paperless Assembly, e-Assembly tia sawi ni bawk hi a taka kalpui a nih hunah chuan hnathawh a awlsam phah bakah, sum sênna tam tak tihbo a nih dawn avangin sorkar inrenchem kawngah nasa takin a ṭangkai dawn a ni," a ti.

Speaker-in workshop a hawn zawhah NEVA coordinator-te chuan thuthar thehdarhtute an kâwm a; NEVA hnuaiah Assembly session-ah bill, paper leh zawhnate chu digital veka kalpui tum a nih thu sawiin, "Paper tel lo session chu kan ti thei lo a, paper hman tlemna session kalpui kan tum," a ti a; chutiang chu Madhya Pradesh-ah hlawhtling taka an kalpui tawh thu an sawi.

NEVA coordinator-te sawi danin, MLA-te chu digital session atana hmanraw pawimawhte pein, a hman dan tur an zirtir dawn. Assembly session atana thil pawimawh hrang hrangte MLA-te'n an download zung zung thei dawn a, thuthar thehdarhtute pawhin an download theihna tur siam a 

ni ang.

Zawhna chhangin Mizorama digital session kalpui ṭan hun tur an sawi theih loh thu sawiin NEVA coordinator-te chuan an sawi a, "MLA-te kan zirtir ang a, an thiam hma dan a zir a ni ang. Kumin chhung kalpui ṭan theih ngei kan inbeisei," an ti.

NEVA hi Ministry of Parliamentary Affairs hmalaknaa ram chhung rorelna in hrang hranga hnathawhnaah lehkha aia information technology hmanga kalpui tura ruahmanna a ni a; hemi hmang hian House-a rorelna leh ṭul dangte awlsam taka mipui vantlang hmuh leh chhiar theih tura chhawpchhuah a ni ang.

Share this Post