Zoram People’s Movement (ZPM) General Headquarters Steering Committee chu nimin khan Aijal Club-ah an ṭhu a; resolution pass-in, ZPM-a tel pawl hrang hrangte chu July 23, 2019 aṭangin political party pakhatah lungrual takin an insuih nghet ta tih an puang.

ZPM resolution chuan, ramri chungchangah, "Chief Minister-in 'Ramri hi a sawia sawifel chi a ni lo, a chinfel dan tur kan hre ru a, tuna sawi chi a ni lo, a tih hi a chinfel hun nghahhlelhawm kan ti a, a sawia sawi fel chi a nih loh chuan a tihin tifel thuai se kan ti," tiin a tarlang.

Resolution-ah hian ZPM chuan, MZP-in political party-te ramri buai chungchangah political advantage lak an hlauh avanga lo inrawlh ve lo tura an ngenna zahin, tun hnaia Vairengte dáia buainaah ZPM MLA-te a hmunah an kal lo tih a tarlang a, "MZP duh dan angin, Vairengte dáia Assam Forest-in kut an rawn thlak chu a rang thei ang bera titawp tur leh Zophaia Pu Ch. Chhunga leileta chawlhbûk sak thuai a nih theih nan Mizoram sorkarin hma la turin kan phût a ni," an ti.

Tun hnaia MPSC-in hna an lak tur interview an koh tawh, Mizoram sorkarin a cancel chu an dem a, a rang thei ang berin MPSC-in interview kaltlangpui se an duh thu an sawi. Mizoram sorkarin tun hnaia School Education department-a 4th grade hna lak turah written test tihtir lak a tum lai a, a aia hna sang zawk zirtirtu written test nei loa lak a tum si chu mak an tih thu leh, written test kaltlang ngeiin zirtirtu lak ni se an duh thu an tarlang.

ZPM chuan, kumina Mizoram hmun hrang hranga sawhthing chíngtuten hlâwk taka an hralh thei chu an lawmpui thu sawiin, "Kum 2018 Election-a ZPM Manifesto, sawhthing kg. khat Rs. 50-a lei a theihzia a lang chiang hleah kan ngai," an ti.

Share this Post