Mizoram State Sports Council (MSSC) chu July 22, Thawhṭanni tlai khan an president Robert Romawia Royte, Sports & Youth Services minister hoin Hawla Indoor Stadium conference hall-ah an ṭhukhawm a, sport association-te sum hman tur an sawiho. SYS Minister chuan, stadium chhâwng sakna tur sum an neih tawh thu a sawi.

Sports Minister chuan, sport association leh district pariatte sum hman tur te, infiammite kit allowance leh dearness allowance-te tihpun a nih thu a sawi a, "Sorkarin infiammite hmasawnna tur nasa takin a ngaihtuah zel a, Mizoram State Games ropui tak neih tuma inbuatsaihna a kal mek. Kan mamawh leh a hmun mil tâwka stadium chhâwng sakna tur sum kan nei tawh," a ti.

Meeting-ah hian, kum 2019-20 chhunga MSSC budget an pawm a; budget-ah hian state level sport association-te sum hman tur chu kum hmasa aiin 20%-in tihpun a ni a, district sports commmitee-te sum hman tur 50%-in a  pung bawk.

Nikum khan Sports Association Promotional Fund-ah Rs. 2,08,70,000 dah a ni a, kuminah Rs. 2,50,44,000 dah a nih avangin Rs. 41,74,000-in a pung. District Sports Committee budget-ah nikumah Rs. 16,20,000 dah a nih laiin, kum 2019-20 atan Rs. 24,30,000 dah a ni a, Rs. 8,10,000-in a pung a ni.

MSSC hnuaiah hian sports association 32 an awm a; an hnuaia awm ṭhin Cricket Association of Mizoram chu Board of Control for Cricket in India (BCCI) hnuaia an awm tâk avangin MSSC aṭangin fund an dawng ve thei tawh lo a, chuvang chuan, promotional budget-te chu sports association 31-te tan sêm zai a 

ni ang.

Share this Post