Mizoram Public Service Commission (MPSC)-in Mizoram sorkara thawk tur group B (non gazetted) post lak hna a buaipui laklawhte chu MPSC-in an khawih chhunzawm tur thu chief minister Zoramthanga chuan MZP hruaitute a hrilh. Hetih lai hian, MPSC chairman Rev. Zosangliana Colney chuan, sorkar thu an zah avangin sorkar hna group B (non gazetted) lâk a tihtawp thu a sawi.

MZP hruaitute chuan nimin khan an president L Ramdinliana Renthlei hoin chief minister Zoramthanga chu a pisaah an kâwm a; MPSC-in Mizoram sorkara thawk tur group B (non gazetted) hna lak an buaipui laklawhte chu buaipui chhunzawmtir turin an ngen.

L Ramdinliana hnen aṭanga thu dawn danin, Chief Minister chuan MPSC-in group B hna lak an buaipui laklawh lai an titawp dawn tih an hriattir loh thu a sawi a, "Mizoram Subordinate Services Selection Board (MSSSB) din fel a nih hma chuan group B (non gazetted) lak hi MPSC-in chhunzawm zel se tih hi kan duh dan a ni," a ti.

Chief Minister leh MZP inbiakna ang chuan, MPSC-in group B (non gazetted) lak hna an buaipui tawh chin chu an buaipui chhunzawm dawn a; chu chuan written exam buatsaih tawh, personal interview chiah la hmabak te, exam tura form fill-up tawh zawng zawngte a huam ang.

Nimin vêk khan Mizoram Pradesh Youth Congress (MPYC) hruaitute chuan MPSC chairman Rev. Zosangliana Colney chu a pisaah hmuin, thil awm dan an zawt a; Chairman chuan, sorkar thu an zah avangin group B (non gazetted) hna lak an tihtawp thu a lo hrilh.

MPSC Chairman chuan, sorkarin group B (non gazetted) lak hna chu MPSC khawih tur a nih tawh lohna notification tihchhuah a nih tawh avangin khawih chhunzawm thei an ni tawh lo tih a sawi a, "Keini tan chuan lo khawi luih zel chu sorkar thupek pawisak lohnate pawh a ni thei. Order kan hmuh reng laia hna lo lak chhunzawm zel chu a inthlahrunawm a ni," a ti.

Group B chin MPSC-in an khawih tawh lo ang tih order chu website-ah bak an hmuh loh thu sawiin Rev. Zosangliana chuan, "Sorkar aṭangin engmah kan dawng lo. A copy tal dawn kan inbeisei a, a nghah pawh kan nghak rei. Order hi June 21, 2019-a chhuah a ni a, sorkarin thu leh hla a neih beiseiin kan nghak reng a ni," a ti a; hna lak kal lai tihtawp thut chu hrehawm an tih thu a sawi.

MPSC Chairman chuan, Group B lakna chu titawp lo thei lo an nih thu sawiin, "Sorkar 

aṭangin 'Lo lak chhunzawm zel rawh u' tih emaw, 'MSSSB a function hma chuan lo la zel rawh u' tihte dawng ila chuan kan chhunzawm mai ang. Order chhuah hnuah sorkar aṭangin engmah thudawn kan neih loh avangin group B (non gazetted) chin lakna kan buaipui hi kan titawp a ni," a ti.

Tarlan tawh angin, MPSC hian July 22, Thawhṭanni khan public notice chhuahin, group B (non gazetted) hna a lak ṭhin chu tihtawp a nih thu a tarlang. Hna lak tihtawp zingah hian personal interview chiah hmabak tawh Home department (Forensic)-a upper division clerk (UDC) tur te, AH&Vety department-a computer operator turte leh Health department-a staff nurse turte an tel a ni.

Share this Post