Zoram Peoples' Movement (ZPM) Ṭhalai chuan thuchhuah siamin, School Education minister Lalchhandama Ralte chu School Education minister a nihna aṭangin zirlaite hmakhua ngaia báng ngam se an duh thu an tarlang.

ZPM Ṭhalai chuan, Zoramthanga hruai Mizoram sorkar chu mipuiin beiseina sang tak nen an thlir mek laiin, tunlaia ram hruaitu chinin an tih duh loh tawp tura ngaih primary school leh middle school zirtirtu - muster roll skilled-II lak turah exam pawh awm loa an kalpui chu an dem thu an sawi a, "MTET pass lo leh computer proficiency certificate (CCC) nei lo mai ni loin, written exam pawh buatsaih loa interview chiah hmanga lak an tum hi Mizoram zirna nasa taka pawngsualnaah kan ngai," an ti.

Primary school zirtirtu 817 leh middle school zirtirtu 64 lakna tur advertisement chu School Education website-ah târ chhuah a nih thu sawiin ZPM ṭhalaite chuan, "MTET certificate leh CCC an neih theih nana theihtawp chhuaha hlawhtling ṭhahnem tak an awm lai leh, written exam hmachhawn thei tura an inbuatsaih mek laia hetianga mâwlmang lutuka zirtirtu lak tum a ni hi a pawi tak zet a ni," an ti a; zirtirtu lak tum dan chu zirna tichhetu tur a nih thu an sawi.

ZPM Ṭhalai chuan, School Education minister Lalchhandama chu MZP president ṭhin a nih thu sawiin, "MZP president a nih laia zirnain hma a sawn theih nana au chhuak ṭhin, Pu Lalchhandama Ralte-in Education minister nihna a chelh hnua a hmalaknaah hetiang thil a thleng hi Mizoram tan thil vanduaithlak tak a ni," an ti.

ZPM ṭhalaite tarlan danin, Mizoram Assembly session, June 21, 2019-ah School Education Minister-in starred question a chhannaah 'Mirethei deuh zawk pawhin sum harsa chung chunga an fate sorkar school-a dah lo a, private school-a an dah chhan ber hriat a ni lo,' tiin a chhang a; zirtirtu lakna turah politics-a induhsakna a awm loh tur thuah 'assurance' a pe thei lo. Chu'ngte avang chuan Education minister Lal­chhandama Ralte chu zirlaite hmakhua ngaia báng ngam turin ZPM ṭhalaite chuan an ngen a ni.

Share this Post