Tun hnaia Lunglei district chhunga chhiat­na thleng chungchang chu July 19, 2019 khan minister C Lalrinsanga hoin Lunglei DC conference hall-ah sawiho a ni a; additional DC David Liansanglura'n a kaihruai.

C Lalrinsanga chuan, chhiatna thlengin a kaihhnawih department hrang hrangten theihtawp an chhuah avanga harsatna thlengte ziaawm zawka mipuiin an tawrh theih phah chu lawmawm a tih thu sawiin, "Khuarel chhiatna chu hunbi nei lo, eng hun pawha thleng thei a nih angin hma­chhawn tura ruahmanna ṭha engtik lai pawha neih a ṭul," a ti a; khawpui chhungah pawh tui luan­kawr mumal leh ṭha zawk nei tura hmalak mek a nih thu a sawi.

Meeting-ah hian, khuarel chhiatna chung­changa a kaihhnawih department hrang hrangte'n an hmalak dan leh chhiat­na thlen leh thulha an mamawh leh an harsatnate an tarlang.

2nd MAP-te chuan chhiatna a thlena chhuak mai thei tur sipai inring sa an neih thu leh an hmanraw neih ang ang­te an sawi a; an duh ang hmarua an neih kim loh thu leh, pek chhuah mai theih tura awm tawh hmanraw ṭhenkhat an hmuh loh thu an sawi.

Meeting-a tarlan danin, ei bar chungchangah, fûrpui thlen hmaa buhfai dah khawl ngaih zualna khaw parukahte buhfai chhêk khawl hman vek a ni. Kum­in October leh November thla thleng tla tur buhfai chhêk khawl a ni tawh a, kudam ṭhenkhat erawh chu a hlui tawh avangin thawmṭhat a ngai thung.

PHE department chuan, leimin leh leikhi vanga hmun ṭhenkhata tui lakna pipe chhia awmte chu an siamṭha vek tawh tih an sawi a; khawpui tui pump chhuahna khawl chu engtik hunah pawh chhe ve thei a nih avangin, ruahtui dahkhawl uar tura inzirtir a pawimawh thu an sawi lang.

PWD sawi danin, kawng min leh lei tawlh vanga kawngpui hnawh pin hmun tam taka awmte chu tihfai vek tawh a ni a; Lunglei district hmun hrang hrangah kawng a tlang ṭha vek a ni.

Tun hnaia ruahsûr avangin Lunglei district-ah khaw 33-ah mipuiin tui­lian an tuar a, lei tlahniam khaw parukah leh leimin hmun 21-ah a awm bawk.

Share this Post