National Highway no. 54, Mualkhang bula leimin zau takin a hnawh chu nimin tlai thleng khan lirthei kaltlang theiha thenfai a la ni lo. Hetih lai hian, Champhai leh Khawzawl inkara July 19, Zirtawpni zana kawngpui min chu Inrinni tlai khan lirthei kal theiha siam tlang a ni.

PWD hotute hnen aṭanga thu dawn danin, Mualkhang bula leimin hi PWD chuan an thian mek zel a, leimin a zau tham a, thenfai tur a tam avang leh lung a tam avangin hna a chak tâwk thei lo a ni. Nimin pawh khan leimin then hna thawh zel a ni.

PWD E-in-C K Lalsawmvela chuan leimin hi motor kaltlang theiha thianfai tur chuan kar khat vel a ngaih mai theih thu 

Vanglaini palai zawhna chhangin a sawi.

NH-54 Kawnpui-Aizawl inkarah lirthei tlan tlang thei rih lo mah se, lirthei lian chi (HMV)-te chu tlang kawng (Durtlang-Kawnpui) lamah tlân phal a nih loh thu, Kolasib SP chuan July 19 khan a lo tarlang tawh a; ni tin mamawh phurte erawh chu hunbi neiin Kawnpui lam aṭangin Aizawl lam pana tlantir an nia thu dawn a ni.

July 19 zan dar 8 rîk hma hret khan Champhai leh Aizawl inkar kawngpui chu Khawzawl aṭanga km. 8 vela hlá, Haidai lui chhakah nasa takin a bal a, lirthei kaltlang theih a ni lo. Kawng hi metre 200 vela thui a chhia a, lirthei ṭhahnem tak an tangkhang.

Champhai District Magistrate leh District Disaster Ma-

nagement Committee ruahman angin kawngpui chu a chhak lam, kopang lamah Inrinni vek khan laih belh a ni a, lirthei tê chi kal theiha laih tlang nghal niin, Inrinni tlai/zan khan lirthei tangkhang eng emaw zat chu an chhuak thei a ni.

Inrinni zing khan Kawlkulh khaw daiah lung lian tak a tlak avangin kawngpui a dang a, khualzinte hun rei tak chhung an tangkhang a, hnathawktute leh khualzin tangkhang hnatlangin tlai dar 5:00 velah lirthei kal theihin an sial tlang.

Share this Post