Leitan Branch YMA chuan Basic Services to Urban Poor (BSUP) Housing Complex, Durtlang Leitana in
ṭhenkhat chima vanduaina tâwkte ṭanpuina an dawn tlingkhawm chu July 20, Inrinni khan a dawng turte hnenah Leitan YMA Hall-ah an sem. Ṭanpuina a sem chhuah chu cheng nuai 9 chuang a tling.
Leitan YMA president K Lalzuiliana chuan, BSUP Housing Complex-a vanduaina thlengah Mizoram hmun hrang hrang aṭanga ṭanpuina
ṭhahnem tak an dawng chu lawmawm an tih thu a sawi.
K Lalzuiliana chuan, YMA-in ṭanpuina sum an dawn khawmte chu BSUP Complex-a awmte hnenah vanduaina an tawh dan azir zelin an sem rual a, mitthi chhung te, hliam te, bungraw chhe vek leh BSUP Complex-a cheng, hmun danga insuan chhuakte chu an tawrh dan mil zela sem rual a ni tih a sawi a; ṭanpuina an dawnte chu ṭangkai taka hmang turin a chah.
Leitan YMA secretary Dr C Lalrammuana sawi danin, UDPA department-in BSUP Housing Complex-a cheng record a neihah chhungkaw 118 cheng anga chhinchhiah ni mah se, Inrinnia ṭanpuina an pek chu chhungkaw 150 an ni a, la pek loh chhungkaw tlem an
la awm.
Dr C Lalrammuana chuan, Mizoram hmun hrang hrang aṭanga mimal, pawl leh kohhran aṭanga sum leh pai, ei tur leh thawmhnaw te, kuang thlenga an dawng chu an lawm hle tih a sawi a; BSUP Complex-a chengte riah lailâwkna tur Durtlang YMA leh Local Council-in an ngaihtuahpui leh a theih ang anga an chhawmdâwl te, Pachhunga University College Adventure Club leh LR Security-in hnatlanga bungrua an thiarpuite chu an lawm tak zet tih a sawi bawk.
Login to comment
No Comments