November 28, 2018-a Mizoram Legislative Assembly inthlanpui neihah Mizoram Bru, Tripura-a awmte vote thlakna tur siam leh buaipui nan cheng nuai 96 hman a ni a; central armed police force (CAPF) chah luh nan cheng nuai 600 chuang hman a ni bawk.

Vanglaini palaiin RTI Act hmanga a zawhna, Directorate of Election SPIO-in a chhan danin, Mizoram inthlanpuia venhimna hna thawk tura state páwn lam aṭanga CAPF chah luhna atana Mizoram sorkarin sum a sên zawng zawng chu Rs. 6,04,08,435 a ni. CAPF atana sum sen zat hi Mizoram chief electoral officer chhuak ta SB Shashank-a hun laia senso tura ruahman, Election departmnent-in sorkar laipuia an dil zat, cheng nuai 1,100 aiin a tlem zawk hle.

Inthlana venhimna hna thawk tur CAPF chah luh leh chumi atana senso chungchangah Vanglaini palai chuan Finance department hotute a kâwm tawh a; Finance hotute chuan, "CAPF rawihna tur bikah, a tìra kan lehkha hmuhah a hmanna tur kimchang a inziak lo. Election atana sum hmanna tur dang zawng zawng chu Joint CEO office aṭangin a hmanna tur kimchang nen kan dawng vek a ni," an ti.

CAPF enkawlna atana cheng nuai 1,100 sên tura tih a ni chu tam an tih thu sawiin Finance hotute chuan, "A tirah sum hi allot turin min ti bik lo a, lo inring turin min ti. Mahse, a tam avangin thuneituten an ngaihtuah ṭhat leh hnuah nuai 371-in a daih turah an ngai a ni," an ti. Finance lamin cheng nuai 371-in a daih tura an ngaih laiin, a tak taka sen zat chu Rs. 6,04,08,435 a ni ta zawk a ni.

Finance hotute chuan, CAPF-te chu Mizorama an awm chhungin dearness allowance, ei leh in, chenna tur, motor, etc. chu state tum vek tur a nih thu leh, an hlawh erawh chu state sorkarin a tum a ngaih loh thu an lo sawi tawh bawk.

MLA Election 2018-ah Tripura-a awm Mizoram Bru-te vote thlaktirna atan sorkar sum sen zat zawhna chhangin Election SPIO chuan, Bru-te tan Rs. 96,64,570 sên a nih thu a tarlang. Bru-te hi Kanhmunah vote thlaktir an ni a, an vote thlakna atan special polling station 15 siam a ni.

Kum 2018 Mizoram inthlanpui endik tura sorkar laipui aṭanga lo kalte (observers) senso zat zawhna chu Rs. 1,92,16,992 a nih an chhang. SPIO tarlan danin, Mizorama election observer lo kal zawng zawng chu mi 59 an ni a, mi 59 tan Rs. 1,92,16,992 sen a nih avangin, chawhrualin observer pakhat tan Rs. 3,25,711.72 zel an seng tihna a ni.

Share this Post