Mizoram People's Conference (MPC) hruaitu ṭhenkhatte chuan Inrinni khan Aizawl Press Club-ah thuthar thehdarhtute an kâwm a; MPC chu Zoram People's Movement (ZPM)-ah an tel tawh lo niin an sawi.

MPC treasurer V 

Lalṭhazuala chuan, ZPM-in Election Commission-ah registration an tifel a, political party an ni ta chu lawmawm an tih thu a sawi a, "ZPM anga thawhhona thuthlung kan neih kha kalpui zel kan duh laiin, ZPM chu political party pakhat a lo nih ve takah chuan movement a nihna a lo tawp ta a. MPC hi kan thawhho tawhnaah kan lungawi a, khatianga party ṭhiat kher loa thawhhona thuthlung ṭha kha chhawm nung zel turin MPC chu a tih theih ang ang ti turin a inhuam a ni," a ti.

ZPM-a telte'n an tum ber chu Congress ni lo, MNF ni lo, kalphung thara sorkar ṭha, mipuite sorkar din a nih thu sawiin V 

Lalṭhazuala chuan, "Mahni party leh pawl 

ṭhiat kher loa grand alliance anga kan thawhhona hi a hlawhtling thawkhat hleah a ngaih theih. Hun teptêr tak karah MLA bial pariatah kan chak thei a ni. Hun nei deuh phei ila chuan sorkarna kan chang thei hialin a rinawm," a ti a; MLA inthlan result chuan pawl/party ṭhiat kher loa hlawhtlinna a thlen theihzia a chian thu a sawi.

MPC Treasurer chuan, grand alliance anga kal zel chu Mizoram siamṭhatna atan a ṭulin a pawimawh an la tih thu sawiin, "Chumi tur chuan thuthlung thar sign-a inbiak a ngai. Chu chu MPC party malin a tihhlawhtlin theih a nih loh avangin inbiakhona leh insiamrena a ngai a, chumi tur chuan MPC chu engtik lai pawhin a inhawng reng a ni," a ti.

Share this Post