Central YMA hnuaia ruihhlo do pawl, Supply Reduction Service (SRS) batch pakuanain ruihhlo an mante chu July 20, Inrinni zing khan CYMA pisa kawtah chief minister Zoramthanga'n a hâl ral. Ruihhlo hâlna puala inkhawmah Chief Minister chuan, ruihhlo ngai sim tawhte chu eizawnna 

ṭha tak sorkarin siamsak a tum thu a sawi.

Inkhawm hi CYMA general secretary Lalhmachhuana'n a kaihruai a, CM Zoramthanga chuan, Seṭhawnah ruihhlo ngaite enkawlna ṭha tak sorkarin a siam dawn tih sawiin, "Ruihhlo ngaite nuam taka an awm theihna tur, infiamnna hmun hma, thiamthil zirna hmun tur, lehkha zirna hmun turte buatsaih kan tum. Drug addict an nihna aṭanga an dam huna eizawnna ṭha tak siamsak kan tum a ni," a ti.

Zoramthanga chuan, ruihhlo do hna chu a hautak hle tih sawiin, "Ruihhlo hi khawvelin a do a, ruihhlo vang hian khawvel indopuia thi zat zet nakinah chuan an thi mai âwm e. Chuvangin, indo puan a ngai tak zet a ni," a ti a; ruihhlo a tlem theihna atan theihtawp chhuah a ṭul thu a sawi.

Ruihhlo zuarte'n ṭhalaite nunna hmangin sum hmuh an tum thu sawiin Chief Minister chuan, "Ruihhlo min supply-tute hi chu tih tak zeta kan do a ngai. Society anga do a hlâwk ber a, Myanmar lama kan unaute pawhin ruihhlo hi society anga an huat a pawimawh. Chumi atan chuan campaign pui beih a ngai a, chu chu tih kan tum," a ti.

Home minister Lalchamliana pawhin thu sawiin, SRS-te thawhrimna a fak a, "Ruihhlo do kawnga kum 2016-a CYMA leh sorkarin inremna an siam 

ṭha kan ti a, chhawm nun zel kan duh," a ti a; ruihhloin kan ram min rûn nasat avangin tha thlah thei kan nih loh thu a sawi.

Excise & Narcotics minister Dr K Beichhua chuan, ruihhloin Mizo ṭhalaite a tihchhiat nasatzia ngaihtuahin, bei a dawng rum rum thei tih a sawi a, "YMA hmalakna hian khawthlir a tiêng leh ṭhin. Ruihhlo vanga nunna chán, an kut leh kê tan ngaite an tam a ni," a ti.

CYMA president Vanlalruata pawhin thu sawiin, "Kan ram mutàn ruihhlo hi ṭanrual pawhin kan do hlawhtling ang tih a sawi theih loh a, ṭanrual loh phei chuan kan hmabak a thim ang," a ti a; YMA chu dan anga en chuan ruihhlo do tur ni lo mah se, a ṭul miau avangin do lo thei an nih loh thu a sawi.

SRS 9th batch convener 

K Lalthlantuma chuan, an hun chhungin ruihhlo cheng nuai 82.17 hû an man thu te, mi 852 an man thu te, Excise & Narcotics hnenah mi 66 leh Police hnenah mi 19 an pek thu te, home-ah mi 47 an dah thute a tarlang.

SRS batch pakuanate hi an term chu kumin April 3 aṭanga July 20 a ni a, batch 10-nate'n ruihhlo do hna an thawk chhunzawm ve leh ang.

Inrinnia ruihhlo hâl zawng zawng chu cheng nuai 25.02 hû a ni a, chungte chu heroin Rs. 24,97,000 hû leh ganja Rs. 5,000 hû a ni.

Share this Post