Queen 'Bohemian Rhap­sody' chuan YouTube-ah viewer tluklehdingawn khat a nei tling ta. Viewer tlukleh­dingawn nei pha zingah 'Bohemian Rhapsody'  hi music video upa ber a ni. 

'Bohemian Rhapsody' music video hi kum 40 chuang kal taa tihchhuah a ni a, hetichung hian ṭhalai tam takah a la tla na reng. Video-sharing site, YouTube chuan he music video hian Thawhṭanni khan viewer tluklehdingawn khat a nei tling tih sawiin, kum 1990 hmalama music video tihchhuah tawh zingah he dinhmun thleng thei hmasa ber a ni bawk. Viewer tlukleh­dingawn an neih tlin pual hian Queen YouTube channel-ah Bohemian Rhapsody remastered HD version thar chu a vawi khatna atan an dahchhuak. Fan-te chuan video en pah hian a lyric hi Italian, Japanese leh Turkish-te pawhin an en pah thei tawh dawn a ni. 

Bohemian Rhapsody hi khawvela hla tihchhuah tawha ropui ber zingah a tel niin mi tam tak chuan an ngai. Kum 2004 khan Grammy Hall of Fame-ah lakluh a ni a, Rolling Stone magazine chhiartute chuan Freddie  Mercury chu rock history vocal performance ṭha berah an thlang bawk. 

Nikum khan Bohemian Rhapsody hi kum zabi 20 chhunga most-streamed song a lo ni tawh bawk a ni. 

Share this Post