Kar tawp Box Office-ah roreltu thar an awm a, chu chu Disney movie The Lion King a ni. The Lion King hi tlangzarh a nih phat aṭangin a ropui nghal hle a, tlangzarh a nih karah ringawt pawh maktaduai 191 aia tam a lalut nghal. July thla chhunga movie, tlangzarh a nih kara sum lalut hnem ber record a siam.

Lion King a duai lo

The Lion King hi tunlai ṭhalaite chuan kan hriat ṭheuh a rinawm. Kum 1994 khan a animated version tihchhuah a ni tawh a, naupang film anga ngaih ni mah se en a hlawh hle a, vawiin thleng pawhin en a la hlawh. Box office aṭanga a sum lakluh ringawt pawh $mtd. 968.5 a tling.

Kumina an tihchhuah pawh hi The Lion King (1994) remake a ni a, a plot pawh a inang hle. Hemi a nih avang hian tlangzarh a nih hma kha chuan mi ṭhenkhat chuan a hlawhtlin pawh an ring hran lo. Mahse an tlangzarh chiah chu a hlawhtling nghal hle a, US Box Office-ah ringawt pawh $mtd. 191 chuang a lalut nghal. US ni lo khawvel hmundanga a lakluh zat pawh $mtd. 269 a tling phak a, a hlawhtling hle tih a chiang.

Kumin chhunga film sum lalut tam pasarihna a ni phak bawk a, a sum lakluh tawh zawng zawng chu $mtd. 543 a tling tawh a ni. (box office kan tarchhuahah hian kar tawp 'weekend' chart tarchhuah a ni ṭhin) 

Aw thawhtute an hrawl

The Lion King (2019)-a aw thawhtute hi  Donald Glover, Seth Rogen, Chiwetel Ejiofor, Alfre Woodard, Billy Eichner, John Kani, John Oliver leh Beyoncé Knowles-Carter tihte an ni nawk hlawm a, hemi vang ringawt pawh hian mi enchak a hlawh phah hle ngei ang.

A script hi Jeff Nathanson ziah a ni a, Walt Disney Pictures produce niin, Jon Favreau chu director leh producer a ni bawk.

Spider-man-in 

ngam loh a tawng

Spider-man: Far From Home chuan Box Office-ah kar hnih ngawt ro a rel hnuah The Lion King a ngam ta lo a, hetichung hian sum a la lalut tam hle tho a, $mtd. 21 chuang a lalut a ni. Tlangzarh a nih 

aṭangin hun a kal leh ta deuh bawk a, Lion King nena an in­thlauh­na erawh a tam hle thung. 

Kar hnih ngawt Chart-a pa­khat­na dinhmun luahtu tho Toy Story 4 chu pathumna a la ni phak bawk a, hei hian Mizo-ten naupang film tia kan sawi tam tak hi tunlai khawvela movie en hlawh ber berte an ni tih a tilang chiang.

Crawl chu palinaah a awm ve thung a, Yesterday chuan a dinhmun ngai luahin panganaah bawk a awm.

Kar hmasa lama palina Stuber chu a tlahniam a, paruknaah a awm thung a, Aladdin(2019) chu pasarih­naah awmin, horror movie Annabelle Comes Home chu pa­riatnaah a awm ve bawk.

Pakuanaah hian Midsom­mar chu awmin, The Secret Life of Pets 2 chuan Top 10 hi a khar a ni.

Kar tawp chart Top 10-ah khan The Lion King tih loh chu hmel thar hmuh tur a awm lo a, Top 50 chinah pawh movie thar pali chiah an lang phak a ni.

Box Office Top 10

1The Lion King (2019)$mtd. 191

2Spider-man: Far From Home$mtd. 21.2

3Toy Story 4$mtd. 15.5

4Crawl$mtd. 6

5Yesterday$mtd. 5

6Stuber$mtd. 4.1

7Aladdin(2019)$mtd. 4

8Annabelle Comes Home$mtd. 2.6

9Midsommar$mtd. 1.59

10The Secret Life of Pets 2$mtd. 1.53

Share this Post