Avengers: Endgame chu a ropuina belhchhahin a awm leh ta a, tunah chuan khawvela movie sum lalut tam ber a ni tawh.

Inrinni zing thleng kha chuan James Cameron-a Avatar kha khawvela movie sum hailut tam ber  a ni ṭhin a, mahse tunah chuan Avengers hian a khum ta a ni. 

Inrinni-ah khan Comic-Con panel-ah hemi chungchang hi Marvel hotupa Kevin Feige chuan a puangchhuak a, Avengers: Endgame chu khawvela movie siam tawh zawng zawnga sum hailut tam ber a nih thu hi a sawi.

Avatar khan khawvel pum box office aṭanga a sum lakluh zawng zawng chu USD tluklehdingawn  2.788 a ni a, kum kua chhung zet chu khum thei an awm lo a ni. Mahse Avengers: Endgame a lo lang a, a rawn che ṭha nghal kher mai. Nitinin a sum lakluh zat tam tak takin a pung tual tual a, kum khat em pawh a liam hmain khawvela movie sum lalut tam ber a ni ta der mai.

Nimin thleng khan Avengers: Endgame hian USD tlukelhdingdawn 2.789 a lalut tling tawh.

China vangin an hlawhtling?

Avengers: Endgame hlawhtlin chhan hi China-a an inhralh ṭhat vang a tih loh theih loh. China-ah ringawt hian USD mtd. 629 zet an lalut a, China-a Infinity War-a an lakluh aiin 75% zetin a tam.

Marvel Phase 4 a pui dawn

Marvel Cinematic Universe hian an la duhtawk mai lo a, hma­sawn an la tum nasa khawp mai.

Inrinni khan Marvel Phase 4-a an film tihchhuah tur ho an puang nghal bawk a, chung zingah chuan fan-te beisei lawk - Black Widow , Falcon and the Winter Soldier, Doctor Strange and the Multiverse of Madness, Hawkeye leh Thor: Love and Thunder-te pawh a tel.

Heng bakah hian Angelina Jolie inlanna tur Eternals pawh a tel bawk a,  Shang-Chi and the Legend of the Ten Rings leh WandaVision-a tel chuan mi tam tak phurna a thlen.

An la duhtawk mai dawn lo niin a lang, Fantastic Four leh X-Men-te pawh MCU-ah hian kan hmu thut mai thei. 

Share this Post