Mizo guitarist ṭha inhlawm­khawm chuan Inrinni zanah khan music video 'Anthem of The Hills' tih chu an tichhuak.

'Anthem of The Hills'-ah hian tunlai Mizo guitarist ṭha an inlan kim hle a, an music pawh a solid ṭhain ngaihthlak a manhla hle.

A bul ṭannaah Mizoram hmun mawi tak tak mai tihlan a ni phawt a, introduction music mawi tak mai an play hnuah India ram ang pawha guitarist hriat hlawh Boomarang guitarist 'Boom'-a chuan mawi tak maiin a rawn zut lut nghal a, beng a fah hle.

The Prophets guitarist 'Erick Renza' guitar khawih a mawi a, Zosanga Ralte kutthlak mawi tak mai ngaihthlak tur a awm bawk. The Breeze 'Ephraim Malsawma' pawhin a style ngai te tein cool tak maiin a rawn play leh bawk a ni. 

El Volente 'Ruatdika Ralte' pawh kum lamah chuan naupang deuh mah se skills lamah erawh a naupang lo e. Victor Da Scavenger pawh a rock lut mawi lehpek hle a, Drop Doubt 'Ztpa' skills san zia ngaihthlak tur a awm leh ta hian music-a tuite beng a fah hle bawk ang.

Atari Minor 'Lawma' leh 'Ztpa' dual vel pawhin beng a titlai hle. Mizo guitar legend tia mi tam takin an sawi 'Hmingpuia' pawhin a play nalh lehpek  a, Dreamhunter 'David Z Hmar' guitar play pawh ngaihthlak manhla tak a ni.

Drums-ah hian Magdalene 'Pate-a' hmuh tur a awm a, Bass guitar hi 'Zonunsanga Khiangte' chuan a play bawk.

Music Video Siamchhan

'Anthem of The Hills' project buaipui tu ber Victor Da Scavenger chuan an video thar chungchanga Vanglaini zawhna chhangin, tunhmain Mizo musician-te hmarchhak leh rampum huapin hriat an hlawh 

ṭhin; mahse tunah hian an thawm a reh ta hle a, Mizoramah guitarist ṭha an tam si a, chumi pholan leh a duh vang a nih thu a sawi. 

State ṭhenawmten tunhnaiah hma an la nasa si a, chumi a nih avang chuan 'fund' pawh awm loin a guitarist puite chu project buatsaih tur hian a be nghal a, anni pawhin an lo remti ta a ni.

Album kan hmu dawn

'Anthem of The Hills' tih hi album hming a ni nghal dawn a, album thar kan hmu hnai dawn a nih hmel.

An album-ah hian guitarist-te hian an solo an dah ṭheuh dawn a, track 11 a awm ang. Album-a music ho hi Apple, itunes. spotify etc.-ah lei tur a awm dawn bawk a, CD pawhin an zuarchhuak bawk ang.

Publisher hi 'Kings and Prophets' an ni a music video pawh hi an YouTube channel-ah en tur a awm a ni. Promoter chu Active Sound an ni thung.

Share this Post