United Nations-a Palestinian palai Riyad Mansour chuan, Israel-in Jerusalem khawdaia daidanna siam bula Palestinian-te chenna in a tihchhiat sak chu a rilru nat thlak hle tih sawiin; Israel chet dan chu 'war crime' anga chhui chian a ngaih thu a sawi. 

New York-a UN Security Council-a thu a sawinaah, Mansour chuan Isarel police leh sipaiten Sur Bahar hmuna bullzoder hmanga Palestinian-te chenna in an tihchhiat lai thlalakte a tilang a ni. "Thawhṭanni zing khan Israel sipaite chuan he hmuna cheng, Palestinian mite chu an inah luhkhungin an nawr chhuak lui a, hemi hnu hian bulldozer leh dynamite hmangin an inte hi an tihchhiat sak a ni. Palestinian mite chuan rilru na takin an in tihchhiat lai hi an lo thlir a ni," a ti. He thil thleng hian a ṭhawngin an rilru a tina hle a ni, a ti a, Israel sipaite chet dan chu 'war crime' a ni tih sawiin; an demawmin an thiltih dan chu chhui chian a ngai tih a sawi. 

Israel sipaite thiltih avang hian chhungkaw 17 chu chenna nei loin an awm a, an zingah hian naupang 11 an tel tih Mansour chuan a sawi bawk. 

Hetihlai hian Israel sipaite chuan chenna in an tihchhiat takte hian Palestinian nen an inkara hungna bang (apartheid wall) an hnaih lutuk a, security lam tan a him lo thei nia sawiin an tichhia tih an sawi thung a ni.

Share this Post