Karnataka-a Congress-Janata Dal (Secular) ṭangrual sorkar fiahna, trust vote neih tur chu hun eng emaw chen tihkhawtlai a nih hnuah Thawhlehni zan khan neih a ni ta a, ṭangrual sorkar chuan fiahna paltlang zo loin paihthlak a ni ta.
Assembly House-ah trust vote motion hi chief minister HD Kumaraswamy putluh a ni a, Thawhlehni zana vote lakah sorkar thlawp lamah MLA 99-in an vote laiin, a thlawp lo lamah vote 105 a tla thung. Vote laknaah hian MLA 20-ten vote an thlak ve lo. Vote thlak lo zingah rorellai party pahniha MLA hel 15 leh sorkar thlawpna hnukdawktu independent MLA pahnih an tel.
HD Kumaraswamy kaihhruai Congress-JD(S) ṭangrual sorkar hi thla 14 ro a rel hnuah paihthlak a ni ta a, BJP kaihhruai sorkar a ding ve leh thung tawh dawn a ni.
Trust vote neihah an chak zawh tak loh vangin Kumara-swamy chuan Thawhlehni zan la la khan Raj Bhavan-ah kalin, governor Vajubhai R Vala hnenah banna a theh luh nghal a ni. Vala chuan amah thlaktu tur tihfel a nih hma chu CM hna chelh chhunzawm rih turin a lo ngen nghal a ni.
Karnataka politics buai chhoh dan
July 6 : Congress MLA 10 leh JD(S) MLA pathumten banna an thehlut a, an zinga 10 chu Mumbai lamah an
kal nghal.
July 8 : Independent MLA pahnih,
ṭangrual sorkar thlawptu pahnihten Governor Vajubhai Vala hnenah banna an thehlut ve leh. Hemi hnu hian Congress-JDS sorkara minister 32-te chuan MLA helte kohkir leh an nih theihna atana cabinet siksawina tur kawng hawngin banna an thehlut.
July 9 : Congress MLA suspend lai
R Roshan Baig chuan banna a thehlut ve leh a, MLA helte hi 16 an tling tawh. Speaker KR Ramesh Kumar chuan banna thehlut zingah 8 chauh chu dan ang taka tih a nih thu a sawi.
July 10 : Ṭangrual sorkara MLA pahnih hel lehin MLA hel hi 18 an tling. Congress minister DK Shivakumar chu MLA helte hi biak tumin Mumbai-ah a kal a, mahse Mumbai police-ten lo manin an kir luih tir leh.
July 11 : Speaker-in an banna thehluh a pawm loh chungchangah MLA hel 10-te Supreme Court-ah an zualko. Tlai lamah Bengaluru-ah kirin, format dik takin banna lehkha an thehlut leh. Speaker chuan thutlukna a siam turah hun pek belh turin SC-ah ngenna a thlen.
July 12 : CM Kumaraswamy chuan
trust vote lak a nih tur thu a sawi. Congress leh BJP chuan an party MLA-te ve ve chu resort lamah an khung hrang zui nghal.
July 13 : Shivakumar chuan Congress MLA hel zinga mi, Nagaraj chu a chenna inah a tlawh. Nagaraj chuan Congress a chhuahsan lo tih a sawi.
July 14 : Nagaraj chuan a thusawi sutin Mumbai lam a pan leh. Congress-in MLA hel leh party veteran Ramalinga Reddy hneh tumin theihtawp a chhuah.
July 15 : Speaker-in July 18-ah trust vote lak a nih tur thu a puang.
July 16 : SC-in MLA helten an banna thehluh ngaihtuah hun tihkhawtlai chungchanga ngenna an thlen chu a ngaihtuah. Zan rei takah Baige chu IMA scam kaihhnawiha man a ni.
July 17 : SC-in MLA helte chu Assembly House rorelnaah tel luihtir theih an ni lo tih a sawi. Ramalinga Reddy chuan Congress lamah vote a thlak tur thu a sawi. MLA hel dangte erawh chuan trust vote neih hunah an tel dawn lo tih an sawi.
July 18 : CM-in House-ah confidence motion a pulut. BJP-in vote lak nghal an phut. Congress leader Siddaramaiah chuan MLA hel chungchanga SC rorel dan a sawisel. Member-te inauhbuai avangin inkhawm tihtawp a ni. Governor-in CM hnenah July 19 chawhnu dar 1:30-ah trust vote la turin a hriattir. BJP-in assembly-ah zankhuain lungawi lohna an lantir.
July 19 : Chawhnu dar 1:30-ah trust vote lak a la ni lo. Governor-in sorkar fiah turin zanlai thleng hun a pe leh. House-ah rei tak debate neih a nih hnuin,
ṭangrual sorkarin July 22-ah vote lak
ngei a tiam.
July 21 : MLA helte thlem let tumin ṭangrual
sorkarin CM thlak a rawt a, mahse an rawtna hian awmzia a nei tawh lo.
July 22 : Nilengin House-ah debate neih a ni. BJP hruaitu BS Yeddyurappa chuan trust vote lak hma chuan House a chhuahsan dawn lo tih a sawi. Mahse member-te inaubuai avangin zanlai-ah inkhawm tihtawp a ni. Thawhlehni tlai dar 6 hma ngeia trust vote la tura tih
leh a ni.
July 23 : Chhun lamah debate neih a nih hnuah, zanah trust vote lak a ni thei ta. Thla 14 ro an rel hnuah, Congress-JD(S)
ṭangrual sorkar chuan rorel chhunzawm zel tura fiahna a paltlang zo ta lo.
Login to comment
No Comments