US president Donald Trump chuan an ram tlawha zin, Pakistan prime minister Imran Khan nena an inkawmnaah, India prime minister Narendra Modi chuan Pakistan nena Kashmir chungchanga an buaina neih mekah palai hna thawk turin a sawm tih a sawi. 

President Trump thusawi hian ngaihven a hlawh zui hle a, nimina Parliament inkhawmah an buaipui nghal a ni. 

Foreign ministry chuan PM Modi hian president Trump hnenah hetiang ngenna hi a siam lo tih a sawi nghal a, Pakistan nena an buaina neihte chu ram pahnihte chuan an sawidun mai ṭhin tih a sawilang nghal bawk. 

Foreign minister S Jaishankar chuan nimina Parliament inkhawmah Trump-a thusawi chu a dik lo tih a sawi a, mahse eptu MP-te chu minister thusawiah hian an lungawi lo a; PM Modi ngei chuan House-ah hemi chungchang hi a sawifiah tur a ni, an ti. 

Congress hruaitu Rahul Gandhi chuan PM Modi chu na takin a bei zui a, Modi chuan India mipuite duhdan leh 1972 Shimla Agreement a phatsan ta a ni, a ti. Rahul Gandhi chuan a twitter-ah, PM Modi chuan an puhna chungchang hi amah ngeiin India ram mipuite hmaah a sawifiah tur a ni, a ti. "President Trump chuan Kashmir buainaah India leh Pakistan inkara palai hna thawk turin PM Modi chuan a sawm tih a sawi. Hei hi thudik a nih chuan PM hian India mipuite a phatsan a ni. Foreign ministry-in a phat sakna hi a rintlak tawk lo. Amah ngeiin US president nena meeting an neih chungchang hi ram mipuite hnenah a sawifiah tur a ni," tiin a sawi. 

Kashmir chungchangah hian India leh Pakistan hi an buai reng a, Pakistan chuan an inkar buaina chinfel pui tur hian midang inrawlh tir a duh laiin India chuan midang inrawlh a duh lo tih a sawi thung. 

Share this Post