Delhi Chief Minister hlui leh India rama CM ni rei thei ber zinga mi Sheila Dikshit chu Inrinni khan kum 81 mi niin lungphu chawlin a thi.

Nimin khan Dikshit hi vui nghal  a ni a, a vuina hunah hian Congress hruaitu hlun tak tak an kal ṭha hle.

Prime minister Narendra Modi, Congress president hlui Sonia Gandhi, prime minister hlui Manmohan Singh, defence minister Rajnath Singh, Delhi chief minister Arvind Kejriwal, deputy chief minister Manish Sisodia, union minister hlui Vijay Goel leh Delhi BJP chief Manoj Tiwari-te chu a chenna in Nizamuddin East-ah Sheila zahna hi an hlan a ni.

Sonia Gandhi chuan Dikshit chu a ṭhian ṭha tak, a laizawn upa zawk ang mai a nih thu a sawi a, Congress party hotu lian a ni, a ti bawk.

Sheila Dikshit hi state-in zahna a hlan theih sang ber hmangin Nigambodh Ghat-ah vuiliam a ni a, a ruang hi AICC headquarters-ah lak phawt niin, party hruaitute chuan zahna an hlan a ni. Zahna hlantu zingah hian  Manmohan Singh leh Ashok Gehlot-te pawh an tel. Hemi hnu hian  Delhi Pradesh Congress Committee office-ah an la leh.

Dikshit hi Congress hruai­tu hlun tak a ni a, Delhi CM dinhmun hi a zawnin term thum 1998-2003 inkarah khan a chelh a, India rama hmeichhe zinga CM ni rei thei ber a ni bawk.

Kum 2011 khan Kerala governor atan ruat a ni tawh bawk a, kumin January thlaah khan  Delhi Pradesh Congress Committee president atan ruat a ni. 

Inrinni khan cardiac arrhy­thmia vangin Fortis Escorts Heart Institute-ah dahluh a ni a, ventilator hmanga thawk tir nghal niin, rei lote hnuah a thi zui a ni. Delhi sorkar chuan ni hnih chhung sunna hun hman tur a nih thu an puang nghal bawk. 

Share this Post