United Nation thupuangtu chuan kum 10 chuang Nigeria hmarlama sorkar leh hel inkara buaina awm vangin mi maktaduai sarih chuangin an dam khawchhuahna atana ṭanpui an mamawh a, mi maktaduai thum velin ei tur thianghlim an nei lo a ti bawk.

UN Secretary-General Antonio Guterres thupuangtu Farhan Haq chuan Boko Haram helpawlte leh Nigerian security force-te inbeihna avang hian mi maktaduai 1.8 vel chu hmun himah suan chhuah an ni tawh tih a sawi a, remna a awm thuai loh chuan sawn chhuah zat hi a la pun theih thu a sawi.

Nigeria hmarlam-ah hian Boko Haram-ten 2009 aṭang khan Islam zirtirna- Wahhabism leh Salafi Jihadism kalpui tumin Nigeria bakah Cameroon, Chad leh Niger-ahte sorkar lakah an hel a, an inbeihnaah hian mi 27,000 vel an thi tawh. UN leh humanitarian organization-te chuan mi maktaduai hnih chuang an ṭanpui tawh bawk. Humanitarian Community-ten 2019 chhunga Nigerian maktaduai 6.2-te ṭanpui nan US dollar maktaduai 848 an hmu tawh, mahse hei hi ṭanpuina an mamawh zat aṭangin 33% chauh a tling a ni. 

Share this Post