Britain-a rorellai, Conservative Party hruaitu thar thlannaah Boris Johnson chu thlan tlin a ni a,  Theresa May thlakin Britain prime minister a ni ang. 

Nimina Conservative party member-ten an hruaitu thar an thlannaah hian Johnson hian vote 92,153 a hmu a, foreign secretary Jeremy Hunt chuan vote 46,656 a hmu. Hruaitu thar thlannaah hian Conservative member 1,60,000 velin vote an nei a, vote tla hi 87.4% a tling. 

Prime minister Theresa May chuan vawiin hian Buckingham Palace-ah Queen Elizabeth II a hmuh hnuin a office a chhuahsan nghal dawn a, hemi hnu hian London mayor hlui leh Uxbridge MP, Johnson chu Prime Minister thar atan ruat a ni dawn a ni. 

Prime minister thar tur Johnson hi European Union aṭanga Britain inlakhranna, Brexit thlawptu a ni. Johnson hian PM a nih chuan October 31 hma ngeiin Brexit deal thar chu EU nena tihfel a tiam a ni. EU-in a rawtnate hi a lo hnial a nih pawhin eng kawng pawhin EU aṭang hian an inlachhuak dawn tih a sawi. 

Party hruaitu atana thlan tlin a nih hnuah Johnson chuan a thlak tur, PM kalchhuak tur Theresa May chungah lawmthu a sawi nghal a, a cabinet-a a tel thei chu atan thil lawmawm tak a ni, a ti. Johnson hi May hnuaiah foreign secretary a ni ṭhin a, mahse Brexit chungchangah an ngaihdan a inmil loh avangin a bang a ni. 

May pawhin Johnson chu a lawmpui thu sawiin, a hmalakna kawng hrang hrangah theihtawpa a lo thlawp tur thu 

a sawi. 

Share this Post