Police-te chet danah lungawi lohna lantirin nimin khan Hong Kong-ah mi tam takin kawng an zawh. Police-te chu an thuneihna dik lo taka hmanga puhin Hong Kong sorkar chu chhui chiang turin an phut a, hemi rual hian a hmaa an thil lo phut tawh hrang hrangte an tarlang tel bawk. 

Kawngzawhte hian a hmaa an lo tih tawh angin thawmhnaw dum an inthuam a, a hmaa an lo dodal tawh, thiam loh chantir tawhte mainland China-a thawn theihna tur, extradition bill an duh loh zia pawh an tarlang tel bawk. Mahse Hong Kong sorkar chuan mipuite dodal vangin he bill hi kaltlangpui a ni dawn lo tih a lo sawi tawh a ni. Hetichung hian he bill duh lohna leh sorkar laka lungawi lohna hi lantir chhunzawm reng a ni. 

Victoria Park aṭangin Wan Chai thlengin kawngzawh hi huaihawt a ni. Court of Final Appeal thleng zawh an tum chu police-ten an remtihsak lo.  Kawngzawh huaihawttu, Civil Human Rights Front (CHRF) vice-convener Bonnie Leung chuan police-te chu an thuneihna bakin an che nia sawiin, an thiltih dan chu chhuichian an phut tih a sawi. Police-te chhui tur hian judge rintlak tak dah an duh tih a sawi bawk. 

Kumin June thla tira Hong Kong sorkarin extradition bill siam a rawt aṭang khan Hong Kong-ah hian nawrh huaihawt chhunzawm reng a la ni. 

Share this Post