Pakistan prime minister hlui, Shahid Khaqan Abbasi chu National Accountability Bureau (NAB) ten ni-13 an hreng dawn. Abbasi hi Pakistan prime minister Imran Khan-a'n Pakistan a thuneihna a chan hnua Pakistan Muslim League-Nawaz (PML-N) hruaitu an man pahnihna a ni.

Abbasi hi eirukna dotu pawl NAB hian kar hmasa Ningani khan manin, tuialhthei lakluhnaa cheng tluklehdingawn eng emaw zat tihchingpen chungchanga thu zawh fiah turin ni-13 chhung an hreng dawn. NAB hian Abbasi hi Ningani khan Liquefied Natural Gas (LNG) Case vangin an ko a, mahse a inlan tak loh avangin Lahore khaw daifema press meet neihnaah an man ta a ni.

Pakistan sorkar hian April thla khan Abbasi chu ramdanga a zin chhuah a lo khapsak tawh a, finance minister hlui Miftah Ismail leh midang panga pawh an khapsak bawk.

PML-N leader, Shahbaz Sharif chuan Twitter-ah thunei­tute a dem thu sawiin, NAB chu PM Imran Khan uite ang chauh a ni tawh, a ti bawk. Ashan Iqbal pawhin PM chu beiin an party chuan cricket aṭanga inlet politician hi Pakistan Adolf Hitler anga a chhuah an remti dawn lo a tia, sorkar chet dan chu a duh loh thu a sawi. 

Share this Post