Gareth Bale-a'n Real Madrid tan International Champions Cup-ah goal a khung a, Santiago Bernabeu chhuahsan tura a dinhmun erawh a danglam phah lo. 

Real Madrid chuan 2-2 a Arsenal an inhnehtawkpui hnuin penalty-ah 3-2 in an chak a, pre-season friendly tournament a nichungin inkhel boruak a sang - red card pahnih phawrh a ni. 

Bale-a'n Real comeback nan goal khung mah se  coach  Zinedine Zidane ngaihdan erawh a danglam lo a, French coach chuan, "Engkim inhre sa vek a, thil inthlak danglam a awm lo," a ti. 

Laipui a puak

Arsenal-in Alexandre Lacazette leh Pierre-Emerick Aubameyang hmangin minute 24 chhung lekin goal hnih an khung a, goal hmasa zawk hi penalty 

aṭanga lut a ni. 

Lacazette-a shot goal ngei tawh tura lang chu Nacho chuan a kutin a lo dang. Spanish defender hian red card a hmu a, penalty a chawi zui. 

French striker Lacazette hian penalty hi pet zuiin goal-ah a chantir a, Aubameyang chuan minute 24-naah goalkeeper Keylor Navas tlan helin a khung ve leh bawk. 

Hello Bale

Arsenal defender Sokratis-a'n Luka Modric a tih tluk avangin minute 40-naah a yellow card pahnihna a hmu a, Real beiseina siamsaktu a ni. 

Bench aṭanga luhtir Gareth Bale chuan minute 56-naah an si phurh a rawn sut ṭhen a, Marco Asensio chuan goal khat dang a rawn khung ve leh bawk. 

Wales international Bale hian goal a khung a ni mai lo a, Calum Chambers-a pet goal ngei tur nia lang chu goalline aṭangin a lo pet chhuak bawk - player hlawh hnem a nih chhan a pholang. 

Penalty chu

Goal dang a luh tawh loh avangin penalty hmanga chak zawk zawn a ni a, Bale-a'n penalty hi a pet goal lo thung - Arsenal goalkeeper Emiliano Martinez tan dan harsa a ni lo. 

Mahse, 3-2 in Real an chak ta tho a, Bale-a'n penalty pet goal lo mah se hun pangngaia a thawh hlawk miau avangin Real chak chhana chhal theih a ni. 

Bale duhtu nia sawi club-ten Welsh forward an it zual sauh ang tih a chiang a, Real tan sum hmuh hnem theihna a nih avangin pre-season tour-a a inlan hi a mak lo. 

Buaina leh Bale

Zidane-a'n Bale hian Bayern Munich a hmachhawn duh loh thu a lo sawi tawh a, Arsenal lakah erawh Welsh forward hian coach thutlukna a hnial lo niin a lang. 

French manager chuan, "Vawiin atan chuan khelh a duh a, pangngai takin training pawh a zawm. Thutlukna siamtu ka ni a, chuvanga khel a ni. Eng thil nge thleng zel dawn kan hria ang chu," a ti. 

Real coach chuan a player chu fak zuiin, "A khel ṭha takzet a, ka lawmpui em em a ni," a ti a, an buaina a zia tawh niin a lang. 

A danglam lo

Zidane leh Bale inkara boruak ṭha lo a zia deuh tawhin lang mah se Welsh forward hi a chhuah ngei erawh a rinawm a, Zidane pawhin a pha chuang lo. 

Real manager chuan, "Bale nen hian a hranpain kan inbe lo. Pangngai taka training a neih avangin a khel a ni mai a, in hriat sa ang khan engmah inthlak danglam a la awm lo," a ti. 

Zidane hian, "Bale-a chhuah vat kan beisei," a tih avangin Welsh forward agent Jonathan Barnett chuan Real coach hi a player zah loah a lo puh tawh. 

Bye bye United

Tun dinhmunah chuan Bale kalna tur hi khawthlang media-te pawhin an la inrinsiak a ni ber a, engmah thuchiang a la awm hleithei lo. 

Bale nena sawi zawm United manager Ole Gunnar Solskjaer chuan Welsh forward hi a duh lo nia sawi a awm a, a chhan ber chu Real hian cham tura a duh Paul Pogba lak tel nana remchanga hman an duh vang a ni!

Hetihlai hian Spanish football commentator Rob Palmer chuan Zidane hian Pogba lakluh a duh avangin Bale hi chhuahtir a tum niin a sawi ve bawk. 

Hello CSL?

Chinese Super League club Jiangsu Suning leh  Beijing Guoan chu Bale duhtua sawi an ni a, buaina erawh Welsh forward hian CSL-a pan a nih chuan kar khatah pound maktaduai khat chuang hlawh a phut. 

China rama sports chanchinbu lar The Oriental Sports Daily  chuan, "Hlawh a tam uchuak avangin a thleng dawn lo," tiin Bale hian CSL a pan loh tur thu an tarlang. 

Hetihlai hian Paris Saint-Germain hming a ri tel a, French club hian an forward lungawi lo Neymar chu Real-a kaltir a, a man atana Bale neih tel an duh. 

Asensio a hliam ná

Real Madrid winger Marco Asensio chu khup hliam vangin zawn chhuah a ngai a, nimin tlai khan thu thar awmin 2019-20 season-ah hun tam zawk a inlan thei dawn lo.

Real Madrid chuan, "A khup (Anterior Cruciate Ligament) a tih nat avangin ni rei lote hnuah zai a ni ang," tiin thuchhuah a siam. Asensio inhliam hi Arsenal tan thu ṭha a ni bik lo, Gunners boss Unai Emery chuan, "Ceballos kan lak loh phah thei a ni," tiin a sawi. Real midfielder Dani Ceballos hi London-ah medical nei turin a awm tawh a, London club hian loan hmangin lak an tum a ni.

Players inlan

Real Madrid: Navas (Courtois 46'), Nacho, Kroos (Fidalgo 65'), Mendy (Marcelo 46'), Carvajal (Odriozola 46'), Benzema (Asensio 46'; Vinicius Jnr 65'), Modric (Seoane 65'), Vazquez, Ramos (De La Fuente 65'), Hazard (Bale 46'), Jovic (Varane 18').

Arsenal: Martinez, Jenkinson, Chambers, Sokratis, Kolasinac, Willock (Monreal 46'), Xhaka, Mkhitaryan (Nelson 75'), Ozil (Saka 74'), Aubameyang (Burton 75'), Lacazette (Nketiah 74').

Share this Post