Test cricket hmanga cricket khel ram liante inelna ICC World Test Championship (WTC) chu kumin aṭangin khelh ṭan a ni dawn. Inelna hmasa ber hi August 1, 2019 aṭangin khelh ṭan a ni ang a, June 2021-ah a tawp ang.

Inelna thar chu

Mizoten cricket inelnaa kan hriat lar ber Cricket World Cup hi chu kum 1975-a neih ṭan tawh kha a ni a, ODI hmanga inelna niin kumina England champion-na kha vawi 12-na a ni.

ICC World Twenty20 a awm ve leh a, he inelna hi kum 2007 khan khelh ṭan a ni a, vawi ruk khelh a ni tawh. Inelna hnuhnung ber chu India-in kum 2016 khan a thleng a, ram 16 zet an tel.

Tun ṭuma inelna tur ICC World Test Championship hi chu Test hmanga inelna tur a nih avangin hun a duh rei dawn a, kum hnih chhung zet neih a ni dawn. Inelna hmachhawn turte pawh thlan bik an ni a, Test khel ram zingah tel thar Afghanistan leh Ireland te an tel dawn lo.

Zimbabwe inrelbawlnaah politics a inrawlh avangin ICC-in an hnuaia inelnaah tel an phal tawh lo. Tun ṭumah hian Australia, Bangladesh, England, India, New Zealand, Pakistan, South Africa, Sri Lanka leh West Indies te chauh an tel ang.

Inelna kalphung

ODI World Cup hnuhnung berah team tel zawng zawng an inkhel kual chhuak vek a, WTC-ah erawh ram pakuate an inkhel chhuak vek dawn lo. 

Ram pakhat hian Test series paruk (3 Home, 3 Away) an khel ang a, series-a match awm zat a zirin an point hmuh a danglam zel dawn.

Ram lian leh ranking sang pali India, England, Australia leh South Africa te chu an inhmachhawn vek dawn a, heng team pali hian ranking hniam zawk team an khelh ve vek a ṭul kher lo a. Inelna hmasa pahnihah ram inhal pahnih India leh Pakistan te an inhmachhawn dawn lo a, inelna vawi hnihna hi kum 2021–23 inkara khelh leh tur a ni.

WTC-ah hian point hmusang pahnihin June 2021 khian Lord's, London-ah final an khel ang.

A ṭanna Ashes

August 1 aṭangin inelna ṭan a ni dawn a, match hmasa ber­ah England leh Australia te an inkhel dawn. Ashes tiha hriat lar England leh Australia inkhel hian ngaihven a hlawh ṭhin a, heta an result hian World Test Championship-a an dinhmun a nghawng dawn avangin  ngaihven a hlawh lehzual ang.

India-in August 22 hian WTC-a an match hmasa ber an khel dawn a, West Indies nen an inhmachhawn dawn. Men in Blue hian Windies hmachhawn tur squad an puang tawh a, captain hlui MS Dhoni chu army regiment a zawm dawn avangin a zin ve dawn lo. Wicketkeeper-batsman Dhoni hi Territorial Army-ah honorary lieutenant colonel a ni.

A tawp nan

World Test Championship hi football-a a anpui teuh ber chu UEFA Nations League a ni a. UEFA chuan friendly match-in ngaihven a hlawh zawk nan friendly match tam zawk nuai boin Nations League a siam a, awmze nei takin Europe ram hrang hrang an inkhel kual.

WTC-ah pawh hian Test cricket khel ramte chu ṭum dang ang thoin an inkhel kual a, amaherawhchu an khelh tur leh an khelh zat tur bituksak niin inkhel result a zirin point pek dan tur siam a ni a. Final awm tur hian inelna a tihlu ang.

India captain Virat Kohli chuan, "World Test Champion­ship hi a phurawm a, Test tan pawh hian a ṭha khawp ang. WTC a awm takah chuan series tinah fimkhur takin chak tumin khelh dan tur duan a ngai dawn," tiin a sawi.

Share this Post