Premier League club Newcastle United chuan striker Joelinton chu Hoffenheim 

aṭangin pound maktaduai 40 zetin an lalut a, an club player manto ber hi season ruk daih contract an ziahpui.

Rafael Benitez thlaktu Steve Bruce-a'n a hna a zawm hnuah Joelinton hi a player lei hmasak ber a ni. Kum 22 mi hian season hmasa khan Bundesliga club tan match 35 a khelh aṭangin goal 11 a khung sak.

Kumin January thla khan Newcastle hian Paraguay playmaker Miguel Almiron chu MLS club Atlanta United aṭangin pound maktaduai 20-in an lalut tawh a, Joelinton hian record dinglai hi a rawn khum chiah.

Brazilian club Sport Recife aṭanga football nun bulṭantu Joelinton chuan, "Newcastle-ah hian Alan Shearer chu ropui takin a lo khel tawh, a hnung zuiin jersey number 9 ka ha thei tur hi ka lawm a, phurna nasa tak min siamsak bawk," tiin St James' Park-ah English striker ropui Alan Shearer hnung zui a tum thu a sawi.

Magpies manager Bruce pawhin a player thar lakah beiseina a nei sang, "Player naupang leh hmabak nei êng a ni a, kan hnehna hlawhtlina duhawm a chan theih ngei ka beisei. Tunlaia player ṭhain an mamawh ang hrang hrang hi a nei kim," a ti.

Newcastle hian season thar inbuatsaih nan Inrinniah Preston North End an hmachhawn dawn, an league match hmasa ber atan August 11 hian Arsenal an mikhual dawn a ni.

Share this Post