Football fan-ten nipui chawlh an nghahhlelh chhan ber ṭhin chu transfer bazar a ni a, player thar an lakluh tur thlirin an ring an fan awk awk ṭhin. 

Mahse, tun nipui transfer-ah erawh Liverpool fan-ten phur taka kut benna tur an nei dawn meuh lo niin a lang - Reds manager Jurgen Klopp chuan, "Sum kan seng tam dawn lo," a ti. 

European champion hian nipui transfer-ah player lakluh nan pound maktaduai 1.3 chiah an la seng a, Dutch rawlthar Sepp van den Berg chu an player lakluh awm chhun a la ni rih. 

A theih loh...

Klopp chuan, "Kan tan chuan transfer boruak lian a ni dawn lo. Tun hnai kum hnih chhungin sum kan seng hnem em em a, kumtinin chutiang chuan kan ti thei lo.

"Pound maktaduai 300 emaw 200 kan sen an beisei a ni mai thei. Mahse, heti zat sum hmang  reng thei chu Barcelona, Real Madrid, Manchester City leh Paris Saint-Germain chiah an ni," a ti. 

Reds hian Fulham rawlthar Harvey Elliott an beisei mek a, mahse Premier League-a inlan thei naupang ber hi kum 16 mi chauh a la nih avangin zângnadawmna pawisa bak insen a ngai dawn lo.

Engtin zel?

Klopp-a'n thlamuanna tur pakhat a nei a, season hmasa lama loan-a chhuak player engemaw zat an kir leh tawh. Hetihrual hian an chelh vek dawn em, a la chiang lo. 

Season hmasaa Derby County lama loan-a khel Harry Wilson a kir tawh a, Welsh midfielder hian Derby tan match 49-ah goal 18 khungin assist vawi ruk a nei a, Reds tana khel turin a ṭha tawk. 

Kum 22 mi Ryan Kent chu Rangers aṭangin Anfield-ah a kir leh tawh a, PFA Scotland Young Player of the Year-a thlan leh PFA Scotland Team of the Year-a lang player hi Rangers-in hawh leh theih an inbeisei thung. 

Bournemouth-a loan-a an kaltir Nathaniel Clyne, Reading tana khel Ovie Ejaria, Gent lama kal Taiwo Awoniyi-te chu loan-a an khelhna aṭangin an kir leh tawh bawk. 

A chhuak lam

Liverpool hian Southampton-ah pound maktaduai 20-in Danny Ings an chhuahtir a, Rafa Camacho chu Sporting Lisbon chuan pound maktaduai sarihin 

an lei bawk. 

Free transfer-a chhuahtir zingah Alberto Moreno chuan Villarreal a zawm tawh a, Daniel  Sturridge-a'n club a la nei lo a, Marko Grujic chu Hertha Berlin chuan pound maktaduai hnihin an hawh.

Season hmasaa match hnih chiah inlan Simon Mignolet-a'n Reds chhuahsan a duh a, mahse Liverpool hian an Belgian keeper hi chelh an duh.

Sheyi Ojo chuan loan-in Rangers a pan a, rawlthar goalkeeper Kamil Grabara chu contract thar a ziah hnuin Huddersfield Town-ah loan-in a kal bawk. 

Reds leh pre-season

Liverpool-in pre-season tour an hmang mek a, Tranmere Rovers leh Bradford City an hneh hnuin Borussia Dortmund leh Sevilla lakah a zawnin an 

tlawm tawh. 

Liverpool hian tukin zing dar 5:30-ah Sporting Lisbon chu friendly match an khelhpui lehnghal dawn a, USA tour an neih meka an match hnuhnung ber a ni ang. 

Tun hnai result pahnihin pholan a nei. Mohamed Salah, Sadio Mane leh Roberto Firmino tel lo chuan Liverpool an che hleithei lo - anni pathum hi ram tana an fehchhuah avangin squad an la zawm rih lo. 

Engtin nge ni dawn?

Tlarhmaa player pathumah Liverpool an innghat mah mah a, player langsar an lak hmel bawk si lo, engtin nge Reds an awm dawn tih chu zawhna a ni. 

Season hmasa Premier League-a Liverpool goal khung 63% chu Salah, Mane leh Firmino khung a ni a, match an khel hnem em em bawk. 

Mane hian season hmasa khan Reds tan minute 4,306 hun a hmang a, Europe top five league-a goalkeeper ni lo zingah ani aia minute khel tam player 18 chiah an awm - an zingah Salah (4,337) a tel. 

Khaikhin ila

Club dang nena khaikhin a nih dawn chuan Liverpool hi season hmasaa an elpui ber City nen khaikhin loh theih an ni lo. 

Reds-in tlarhma player pathum rim taka an chhawr laiin City-in tlarhmaa first choice an neih chu Sergio Aguero, Raheem Sterling leh  Bernardo Silva te an ni. 

Mahse, an zinga khel hnem ber Sterling pawhin  4,096 minutes bak a khel lo a, a zawna game a khelh hnem ber chu vawi 10 a ni - Liverpool tan Salah-a'n a zawnin match 50 a khel thung!

Pep Guardiola tan tlarhma pathum hahdam niah pawh Riyad Mahrez, Leroy Sane, Gabriel Jesus leh Phil Foden an la awm cheu a, hei tak hi Liverpool-in an phak lohna a ni. 

A pawi thei

Nipui chawlh laiin Firmino, Salah leh Mane te an chawl hahdam hman lo a, hei hi Liverpool tan buaina thlentu a ni thei. 

Firmino hi Copa America-a champion hlim a ni a, Salah leh Mane ten ram tan AFCON an khel bawk. Chawlh nei tam lo tak chungin squad an zawm dawn tihna a ni.

Klopp chuan, "Phunchiar tak anga lan ka duh lo. Mahse, Mane hian season khatah thla 13 a khel ang vel a ni. Ka player-te an chau a, inhliam kan neih loh ka beisei," a ti a, chau taka season bul ṭan a hlau hle. 

Liverpool hian season bul ṭan nan Community Shield chu August 4 zan hian an khel dawn a, Manchester City-in Premier League leh FA Cup an chawi zarah Jurgen Klopp-a hote an inlan dawn. Reds hian kum 2006 hnua an vawi khat khelh lehna tur a ni.

Share this Post