Liverpool nen pawha sawizawm hlawh tawh tak Nabil Fekir chuan Real Betis a pan. Spanish club hian pound maktaduai 22 sengin season li chhung atan inremna an neih pui.

Kum 26 mi Fekir hian Thawhṭanni khan Spain a thleng tawh a, a rual hian a nau forward Yassin pawh Lyon aṭangin Betis-ah hian a kal ve ngal bawk.

Nipui bazar hmasa khan Fekir hi Liverpool chuan an lalut teuh hle, mahse a khupa hliam a neih vang leh club inremna fuh tawk lo 

ṭhenkhat vangin Anfield a pan lo.

Ligue 1 club chhulchhuak Fekir hi talent nei ṭha tak a ni a, a club tan inelna hrang hrangah match 192 a khelh aṭangin goal 69 a khung tawh - a ṭhiante khung tur ṭum 41 ngawt siamsak tawh bawkin tlarhma lam thuam chaktu pawimawh a ni.

Kum 2017 aṭang khan Fekir hi Lyon captain a ni tawh a, nikum khan France chu World Cup a chawi pui bawk. Real Betis a pan takah chuan Tottenham-in Betis aṭang hian midfielder Giovani Lo Celso chu an chang thei ve thung dawn niin a lang.

Share this Post