Frank Lampard-a enkawlna hnuaiah Chelsea fan-ten thu lawmawm an hria a, nimin khan friendly match-ah 2-1 in Barcelona an hneh. 

Friendly match mah ni se Chelsea hneh hi Barcelona an ni miau a, Blues player-te theihna tak tak 'enchhinna' ṭha tak a ni - players an inringtawk sawt ang. 

London club tan hian Tammy Abraham (34') leh Ross Barkley (81') ten goal khat ve ve an khung a, hun pek belhah Ivan Rakitic chuan Barca tan 

ṭha zetin goal a rawn khung ve bawk. 

Chelsea fans tan club lian lakah pawh Tammy Abraham a talbuai lo tih hmuh hi a nuam ang. Kum 21 mi striker hian season hmasa kha Aston Villa-ah loan-in hun a hmang a, Championship-ah match 37 khelin goal 25 a khung. 

Barcelona tan pound maktaduai 107 man Antoine Griezmann chuan a match hmasa ber a khel a, Atletico Madrid striker hlui hi tlarhmaah chhuak tur anga sawi Ousmane Dembele nen inkawp fuh viau mah se Chelsea keeper Kepa Arrizabalaga tan hna hautak erawh an siam lo. 

Barcelona tan Copa America khel chau Lionel Messi leh Luis Suarez erawh an la inlan ve lo a, player thar zingah Frenkie de Jong chu second half-ah luhtir a ni bawk. 

Share this Post