Real Madrid coach Zinedine Zidane chuan Bale diriam lutuk anga sawi a nihna chu a pha a, "Tu chungah mah zah lohna ka lantir lo," a ti. 

French manager hian Bale chungchangah, "Gareth Bale hi a chhuah vat kan beisei," tiin a lo sawi tawh a, he ṭawngkam hi Welsh forward agent  Jonathan Barnett chuan inzah lohnaah 

a ngai. 

Jonathan chuan, "Zidane ṭawngkam hi pai dam harsa tak a ni. Real Madrid tana a theihna zawng zawng hlantu Bale laka a ṭawng dan hi a mawi lo em em a, a zah lo a ni," tiin Zidane chu Bale zah loah a puh. 

Mahse, Zidane chuan a ṭawngkam hi sawifiah zuiin, "Bale chhuak tura hma kan lak mek thu ka sawina mai a ni. Ka sawi fo ṭhin chu player an pawimawh ber tih hi a ni a, puih an ngaihnaah chuan ka pui fo ṭhin," a ti. 

Zidane hian Bayern Munich an hmachhawn ṭumin Bale chu a inlan duh lo tih a sawi zui a, "A chhuah dan tur kan buaipui mek avangin luh a duh loh thu a sawi a ni," a ti a, tukin zing dar 4:30 khan Real hian pre-season tour-ah Arsenal an hmachhawn.

Bale hi Manchester United, Tottenham Hotspur, Bayern Munich leh Chinese Super League club Beijing Guoan nen sawi zawm mek a ni a, he thu buatsaih a nih thleng hian thuchiang a a la awm thei lo. 

Beijing Guoan hian Bale hi kar khatah pound maktaduai khat hlawhtir an inhuam niin sawi a awm a, Jiangsu Suning hming sawi rik a awm bawk - Bale hian kar khatah chhiah pek hnuah £350,000 a hlawh mek. 

Hetihlai hian Spurs boss Mauricio Pochettino chuan an player hlui laklet chungchanga an hming lo lang chu engmah a hriatpui loh thu a sawi. 

Argentine manager chuan, "Media aṭangin ka lo hre ve a, mahse eng club-in nge Bale hi lakluh tum ka hre lo. Keimahni nge club dangin lalut dawn tih pawh ka hre lo. 

"Player dawr lam chu ka hna a ni lo. Squad ṭha thei ang ber din tumin kan Chairman-in hma a la a, a kutah engkim kan dah a ni," tiin a sawi. 

Share this Post