Chinese Boxing Federation chuan an ram Olympic boxing team 'special adviser' ni turin boxer ropui chawl tawh Floyd Mayweather nen inremna an neih thu an puang.

Kum 42 mi Mayweather hian Tokyo 2020 atana Chinese Olympic boxing team inpuahchah hunah a pui dawn. Mayweather hian kum 2017 khan UFC fighter Conor McGregor chu a hneh a, American boxer hian hneh loh tawng loin a record chu 50-0 a ni a, heng zinga 27 hi knockout a ni.

Mayweather hian McGregor a hneh zawh hian a vawi thum nan a chawlh thu a puang. December 31, 2018 khan American boxer hian Japanese kickboxer Tenshin Nasukawa chu exhibition boxing bout-ah a hneh a, hetah hian dollar maktaduai 9 (£7.07m) a hlawh niin an sawi.

Zou Shiming chuan Athens 2004-ah khan China tan a vawi khat nan Olympic-ah medal a la a, Light flyweight-ah bronze medal a hlawh chhuak. 2008 Beijing leh 2012 London-ah Zou Shiming hian gold medal a dawng ve ve.

China hian Rio 2016-ah medal pali an la a, flyweight-ah Hu Jianguan chuan bronze medal lain hmeichhe boxer Yin Junhua (silver), Ren Cancan (bronze) leh Li Qian (bronze) ten medal an la bawk.

Share this Post