Real Madrid mid­fielder Dani Ceballos chuan loan hmangin Arsenal a zawm dawn, khaw­thlang media-te chuan Spain international chung­changah club pahnih an inrem tawh niin an tarlang.

Kum 22 mi Ceballos hian 2017 khan Real Betis aṭangin Real Madrid a zawm, Spanish club lian tan hian season hnih chhungin inelna hrang hrangah match 56 a khelhsak. Gunners hi season khat chhung atan a zawm a nga, a loan hun a hman zawh hnuah player leh club hian a ngheta la turin inbiakna an la nei leh thei dawn.

Nipui bazar inhawn rualin Aaron Ramsey chuan Juventus a pan a, Tottenham pawhin an ngaihven Ceballos hi Ramsey aiawh thei tura ngaih a ni ang.

Gunners manager Emery chuan, "Ceballos hi Betis leh Real Madrid tana a khelh laiin ka hre tawh a, player ṭha tak a ni. 2019 European Championship Under 21-ah Spain a champion pui bawk, midfield lailum luah thei a nih bakah striker hnungah a tlan thei bawk," tiin a player thar tur lakah beiseina a nei sang hle.

Arsenal leh Tottenham te hian Saint-Etienne centre-back William Saliba pawh an inchuh a, kum 18 mi defender hmabak nei êng tak hi Gunners lamin an chang thei dawn niin a lang ta.

France youth interna-tional hi pound maktaduai 27 bawr vel man tur a ni, mahse Ligue 1 club-ah hian tun season thar lo awm tur hi loan hmanga a let nghal dawn avangin a man hi tun dinhmuna pek tlak nghal tur a ni dawn lo.

US tour bika an match hnuhnung atan tukin hian Arsenal chuan Real Madrid an hmachhawn a, season thar inbuatsaih nan Lyon, Angers leh Barcelona te an la hmachhawn leh ang. August 11 hian an league match hmasa ber atan Newcastle an hma-chhawn ang.

Share this Post