Mizoram Football Association-in season bul ṭanna atana an hman Lalbiakliana Memorial MFA Super Cup chu vawiin aṭangin Lammualah khelh 

ṭan a ni dawn. 

Ni hmasa berah hian match thum khelh a ni dawn a, tlai dar 2:00-ah MPL club Chawnpui FC leh Aizawl DFA first division club Sihphir Venghlun inkhel chu hmuhnawm ber tura ngaih a ni a. Chawnpui FC hi Mizo coach zinga tawnhriat nei ṭha ber pawl HC Zarzoliana kaihhruaina hnuaiah an khel ang.

Chhun dar 12:00-ah tualchhung club hlun Dinthar FC leh Lushai FC te an khel dawn. MPL champion hmasa ber Dinthar FC hi Aizawl DFA first division club an ni a, an khingpui tur Lushai FC hi ADFA third division club an ni.

Kumin match hmasa ber hi chawhma dar 10:00-ah khelh ṭan a ni dawn a, Bualpui FC (Kolasib DFA) leh Darlung GSA (Mamit DFA) te an inhmachhawn ang.

21 chauh maw?

Kumin inelnaah hian team 21 chauh an tel a, Mizoram chhunga club awm zat thlir chuan tel an tlem hle. Nikum khan club 38 an tel a, kuminah team 17-in an tlahniam tihna a ni.

MFA hnuaiah MPL club pariat an awm a, tel vek tura ngaih an nih laiin Chhinga Veng, Ramhlun North leh MPL kaithar FC Venghnuai te an tel lo. MFA Super Cup champion lai Chhingcows hruaitu pakhat chuan, "Tel ngei turin thutlukna kan siam a, nomawi humhim tumin kan inpuahchah. Amaherawhchu, entry fee pe tawhah kan inngai a, team enkawltute zingah inringthul an awm vang niin pawi kan ti takzet," tiin Vanglaini a hrilh.

Entry fee pek huna pe lo Chhinga Veng an thiam lo a, chutihrualin MFA pawh champion lai tel loin inelna hlutna a tihhniam thei tih hre turin tawnhriat an ngah tawh avangin insawifihlim thei an ni bik lo.

Kumin inelnaa team tel an tlem chhan lian ber chu CYMA Football nen an inhnaih vang a ni a, club ṭhenkhat inpuahchahna hun a tlem vanga tel lo an awm nual. Hei bakah hian inelna hi tel ngei ngei tur a nih loh avangin club tenau zawkin sum sen thlawnnaah an ngai a, an hmabak inelna atana ṭha zawka inpuahchah an duh zawk.

Inelna chu

MFA Super Cup hi a khelh hun chhung ngaihtuah chuan lawmman ṭhatna ber zinga mi a ni a, champion team hian Rs 1,50,000 an dawng dawn. Lawmman hi Round of 32 lut chin tan siam a ni a, tun ṭuma hian team 21 chauh an tel avangin inelna hmachhawn hrim hrim hian Rs 2,000 an dawng dawn.

Club ṭhenkhat Last 16 aṭanga bul ṭan turte chu an chak lo a nih pawhin match khat lekah Rs 3,500 an dawng dawn tihna a ni a. Pawisa dawn aia hlu zawk erawh club tenau tan I League club Aizawl FC leh MPL club ṭha tum theihna hun ṭha a ni a, team leh player theihna fiahna hun ṭha a ni.

MFA Super Cup chu

MFA Super Cup hi kum 2013 khan khelh ṭan a ni a, MPL champion leh knockout inelna (MFA Cup/I Day Football) champion-te an inhmachhawn ṭhin. Chanmari FC-in nomawi hmasa pahnih an chawi a, Bethlehem Vengthlang FC an champion tawh bawk.

Kum 2016 aṭang khan kalphung thlakin MFA leh a hnuaia District FA-a in ziaklut hrim hrim club tan tel theih a ni. Knockout hmanga khelh a nih hnuah Aizawl FC chu champion hmasa ber an ni a, inelna hnuhnung pahnihah Chhinga Veng an champion.

Share this Post