Barcelona forward Antoine Griezmann chuan a club tharah hun rei lote chhunga a insiamrem theih a beisei thu a sawi a, Catalan club tan player pawimawh leh 

ṭangkai nih a tum.

Kum 28 mi Griezmann hian tun thla tir khan Atletico Madrid aṭangin pound maktaduai 107-in Barca hi a zawm a, tunah hian season thar inbuatsaih nan Japan khawpui Tokyo-ah an zin mek.

France international Griezmann chuan, "Atletico tana ka tih tawh ṭhin dan ang kha Catalan club tan pawh harsa lutuk loin ka her rem theih mai ka ring. Barca khelh ṭhin dan ka hre sa a, he club tan hian kawng hrang hrangin tha ka thawh theih ka beisei," tiin a sawi.

Atletico Madrid tana a khelh laiin Griezmann hian match 257 a khelh 

aṭangin goal 133 a khungsak a, nikum June thla mai khan a club tan hian kum nga daih contract ziak mah se club lian leh ropui zawk Barca sawmna a hnar zo lo.

Barca tana a hun tawn hmasa lam sawi zawmin Griezmann chuan, "Training kan neih hmasak ber kha chu a harsa hle, ka kap karah ball vawi hnih min pet luh kum, vawi khat pet luttu chu Ivan Rakitic a ni.

"Helai hmunah chuan match zawng zawnga chak tumin training kan nei a, dawhthei taka beih pawh a ngai dawn. Hnehna chan vek kan duh avangin chumi tur chuan kan thawhrim pawh a ngai hle a ni. Barcelona player dangte nena in man taka khelh theih hi ka tum pawimawh a ni," a ti.

Atletico Madrid manager Diego Simeone nen an inkar boruak sawiin Griezmann chuan, "Inpawh takin kan la inbe reng, khelmual chhungah ka tan a pawimawh a, pawn lam nunah pawh min kaihruaitu a ni bawk. Infiamna piah lamah thuk takin kan inpawh a ni," tiin a sawi.

Share this Post