Marco Reus chuan Bo­russia Dortmund nen in­zawmna thuk tak an neih thu a sawi a, a inzir chhuahna hmun a chhuahsan hnua a kir leh chhan lian tak chu Jurgen Klopp a nih thu a sawi bawk.

Reus hian a naupan lai chuan Dortmund youth team tan a khel ṭhin, kum 16 mi a nihin Rot Weiss Ahlen-ah a kal. Senior team tana Bundesliga a khelhna hmasa ber erawh Borussia Monchengladbach a ni thung.

Monchengladbach tan hian season thum chhung­in goal 36 a khung bakah a ṭhiante khung tur vawi 25 ngawt a siamsak. Dort­mund aṭanga Shinji Kagawa a chhuah hnu khan, manager Klopp chuan Japan midfielder hmunruak luah turin a senglut.

Kum 30 mi Reus chuan, "I hmaah Jurgen a awm a, aw ring taka a kaihruai che a nih chuan inrintawkna sang tak a siamsak ngei ang che. Ani hian Dortmund-ah min hruai kir leh a, inbiakna kan neih hmasak ber aṭangin min hneh.

"Club dangah pawh khan hlimna chu ka hmu tho. Amaherawhchu, ka bul ṭanna Dortmund ka theihnghilh lo a, he club nen hi chuan thisenin kan inzawm tlat a ni," a ti.

Kum 2015-16 season 

aṭang khan Reus hi Dortmund captain a ni a, hliam vangin buai fo mah se nikum kha chuan harsatna lian tham tawk loin a khel tluan. A club hi league-ah pahnihna nihpuiin, season tawp dawna an tawlhthluk zeuh vangin Bayern Munich an tluk lo.

Share this Post