Tunkar chhung hian Japan Open BWF Su­per-750 Tournament khelh a ni dawn a, hun tepter tawh takah Saina Nehwal chu a inhnukdawk. PV Sindhu chu India nula zinga medal la thei tura beisei a ni ang.

London Olympic bronze medalist Saina hi tun hnaiah hliam tenau hrang hrang vangin a inkhelh lohna a rei tawh, tun ṭuma a inlan loh chhan tur pawh chiang taka sawi ni lo mah se August thlaa khelh tur World Championship atana fit ṭha zawka inlan a duh vang nia ngaih a ni.

Kar hmasa khan Sindhu hi Indonesia Open-ah a inlan a, final thleng mah se Japan nula Akane Yamaguchi a ngam loh avangin pahnihna a ni - player pahnih hi an kaltluang a nih chuan quarterfinal-ah an inhmachhawn leh ang.

Indian shuttler Sindhu chuan, "Indonesia lama ka inkhel kha ka thlir kir tawh a, chawhrualin match tin kha ka khel 

ṭha hleah ka ngai. Tokyo-ah pawh khatiang bawk khan ka khelh leh theih ka beisei," tiin beisei a neih san thu a sawi.

Mipa singles lamah Kidambi Srikanth chuan vawiin hian a match hmasa ber a khel dawn a, amah ang thoa Indian shuttler HS Prannoy nen an inhmachhawn ang; an intawn tawhnaah Srikanth hian 4-1 in hma a hruai.

Share this Post