Infiamna khawmpui lian Tokyo Olympic chu nakkum maia neih tur a ni tawh a, he huna inlan tumin infiammi hrang hrangin inelna an hma­chhawn mek. India pawhin a tam thei ang ber athlete tirh a duh, chutih rualin National Anti-Doping Agency (NADA) chuan Japan rama kal tur hi an thlan fimkhur tur thu an sawi.

National Anti-Doping Agency director general Navin Agarwal chuan Olympic khel tura qualifier paltlang tawhte pawh, India an chhuahsan hmain damdawi hman phal loh chungchangah an fihlim em tih chu vawi thum emaw vawi li tal an endik tur thu a sawi a ni.

Fimkhur a ngai

Damdawi hman phal loh hman chungchangah infiammi ropui tak takte pawh an lo hmingchhe tawh ṭhin, an medal dawn lak kir sak hial pawh an awm. Olympian ropui Usian Bolt pawh 400m relay bika a gold medal lak chu a teammate zingah dan dik loa thil ti a awm avangin lak let sak a ni tawh.

Sochi Winter Games an thlen ṭumin Russia chuan an ram sorkar hriatpuina ngeiin infiammi eng emaw zat chu dan a bawhchhiattir tawh. Russia thil tih dik loh hi hriat chhuah a ni a, International Olympic Committee chuan an ram hming hian an tel a phal tawh rih lo hial.

Infiammi dan bawhchhia hi tarlan vek sen pawh an ni lo a, tennis khel thiam hmingthang Maria Sharapova pawh thla 15 chhung tehmeuh hrem a lo ni tawh bawk. Mimal bakah ram hmingchhiat theihna a nih avangin NADA an fimkhur tur hi a mak hran lo.

NADA thu chu

National Anti-Doping Agency (NADA) director gene­ral Navin Agarwal chuan, "Kum 2018 March thla aṭanga March 2019 inkarah khan dan bawhchhia 187 ngawt hmuh chhuah an ni. Season khat chhunga pawi khawih man chhuah an tam ber ṭum a ni," tiin tun hnaia India dinhmun chiang takin a sawi.

Fimkhur an tum thu sawi zuiin, "Tokyo Olympic hmain kum khat vel chauh a awm tawh, infiammi tam takin qualifier leh world championship hrang hrang an khel. Inelna neih dawn hnai­teah chauh a kal tur pawh a chiang thei ang tih chu hriat sa a ni.

"Mahse, NADA chuan ruahmanna fel tak a nei a, Japan an kal hmain athlete-te chuan endikna vawi li vel tal an hmachhawn hman ang. Keni chuan hlawhtlinna chan kan duh rual chiah hian, infiamna dik leh felfai kan duh bawk," tiin a sawi.

Olympic leh Mizo

Mizoram State Sports Council hnuaia association hrang hrang ten Olympic-ah infiammi neih theih ngei tumin hma an la a, tun dinhmunah chuan Hockey leh Weightlifting chu Mizo lan theihna tur hnaivai niin a lang.

Rio Olympic-ah khan Mizo nula Lalruatfeli Hnialum chu hockey team-ah a tel tawh a, nakkum Olympic-ah India nulate an zin leh phak a nih chuan Lalremsiami Hmar chu feh chhuak zingah a tel ngei beisei a ni.

India nulate hi qualifier khel turin an inbuatsaih mek a, tunah hian Bengaluru-ah training camp nei mekin Siami pawh a tel. Youth Olympic silver medal an lak ṭuma captain hi Japan-ah pawh player pawimawh a nih theih beisei a ni dawn.

Youth Olympic gold medalist Jeremy Lalrinnunga pawhin qualifier a khel chho mek a, inelna tak hmachhawn tur hian qualifier paruk tal an khelh a ngai. Tunah hian Australia-ah training neiin a awm mek a, Japan pan thei tur erawhin kawng zawh tur thui tak a la nei.

Share this Post