Kum 40 mi zet ni tawh mah se Manny Pacquiao-a'n a thiam a la theihnghilh lo. Nimin zing khan WBA (Super) welterweight champion Keith Thurman chu split decision (115-112,115-112  114-113) hmangin a hneh a, welterweight champion thei upa ber record a 

siam nghal. 

Boxing khawvela la tlawm ngai lo Thurman-a'n Pacman nen an intawn hmain, "Ka chawlh hahdam tir tawh ang," tiin sawi mah se a vawi khat tlawmna a tem ta zawk a, khawvelin Pacquiao a fak. 

Kum 30 mi Thurman hi round khatna lekah Pacman hian a hnek tlu a, mahse tlu hlen loa insiamṭhain a tho leh vat - judge thutluknaa innghah zui ngaiin khel mah se a tlawm zawkah a ṭang ta tho. 

Thurman chuan, "Round khatnaah min hnek tlu a, round one-ah a dinhmun a ṭha phah. Kan inhnehtawk hle tih ka hria a, boxing tan zan duhawm tak a ni," a ti. 

Pacman a tawn hma 

vawi 30 inhnek a hmachhawna chak vek Thurman hi round nganaah a hnar a thi a, san zawng leh rih zawngah chungnung zawk mah se taksa lian zawk a nihna a chhawr thei lo. 

Thurman chuan, "Manny Pacquiao hi chu boxer ropui bik a ni a, champion dik tak a ni," tiin a fak zui. 

Pacquiao-a'n inhnek hmachhawn zui a tum rih lo. "Nakkumah ka inhnek leh chauh ka ring," a ti a, an ram Philippines lamah Senator a nih anga hna thawk leh turin a haw phawt ang. 

Pacman hmaa ding leh thei tura sawi rin ber chu Amir Khan a ni a, mahse kum tawp lama British boxer nen inhnek tur anga sawi chu Filipino boxer hian a lo pha tawh thung.

Hetihlai hian nimin zinga heavyweight inhnekah Dillian Whyte chuan unanimous decision-in (115-112, 115-112, 116-111) Oscar Rivas a hneh a, interim WBC heavyweight title a hlawh chhuak.

Share this Post