CYMA Football-ah a vawi khat nan Chanmari an champion a, Inrinni khan vawi nga champion tawh Armed Veng 4-1 in an hneh. Chanmari midfielder Rochhingpuia chu best player-ah thlan a, inelna sponsor-tu LBS Suzuki tum Scooty Access a dawng.

Suzuki Gixxer SF 250 20th Inter Branch YMA Football Tournament final en tumin Lammual khat mipui an pungkhawm a, Chanmariin game plan fuh leh an thiamna hmangin hnehna an chang. Chanmari hian 'champion parade' an nei a, an veng kawnah champion lawmna neiin an hlapui 'Shabaash' nen lawmna hmasa an nei -programme felfai taka duangin inkhawm dar hmasa rik hmain an ṭin fel vek.

An inrem fuh

Chanmari coach Samuel Lalrinzuala Sailo-in inkhelh hmain dressing room-ah player-te inngaihtuahna hun a pe a, minute 90 zawha thleng tur a suangtuah tir. Samuel hian player hi a fuih phur ringawt lo a, awmze neiin player a rem bawk.

Final-ah Zakaria Lalhriatpuia rawn dah lutin mual ding lamah a awm. Chanmariin Zakaria leh V. Lalruatsanga te hmangin Lalramchullova tel lohna Armed Veng tlarhnung chu ding leh veiah an duh thalin an su hawng a ni ber.

Chanmariin an goal nawr nat vangin corner kick an hmu a, Chhinga'n petin defender Lalrinchhana Tochhawng-in minute 5-naah a tauh lut. Armed Vengin Lalbiakhlua freekick hmangin minute 22-naah sut mah se Chanmariin corner aṭang bawkin hma an hruai - Chhinga bawkin petin Lalhriatrenga'n (Achia) a tauh lut.

Armed Veng harsatna belhchhah turin Saidingliana talbuaiin striker khung atana mawiin an lamah a tilut. Inkhel thunun chunga first half-ah goal thum an khung avangin Chanmari an chak dawn tih a chiang a, Armed Vengin Chullova tlarhnungah pawt let mah se a tlai tawh.

Chanmari midfield leh tlarhmaa C. Lalhriatpuia, Jerry Mawihmingthanga leh Rosangliana te awm chu Armed Vengin an ngam lo. Second half-ah Chanmariin goal tam zawk khung theihna hun ṭha an nei a, vawi tam tak Chanmari tihmingṭha tawhtu Jerry-a'n injury time-ah champion nemnghehna goal a khung.

Chanmari hian inkhel thunun hlak mah se Armed Vengin goal khung theihna tur an nei tho a, best keeper atana thlan MS Dawngliana'n (MS-a) a thiam thil pholanna atan a hmang.

Chanmari coach Samuel Lalrinzuala Sailo chuan, "A hmasain Pathian hnenah lawmthu ka sawi a, kan naute inpekna, thawhrimna leh theihtawp an chhuahna rah niin ka hria. Tupawh an khel ṭha vek a, kan game plan angin kan khel chhuak thei a ka lawm hle bawk. Khawtlang mipui thlawpna leh ṭawngtaipuina vanga tun dinhmun thleng thei kan ni," tiin Vanglaini a hrilh.

Chakna thuruk

Champion team-ah Chanmari FC player an tam a, coach thar S. Malsawmtluanga hoin June 1 aṭang khan an practice ṭan tawh a, inelna hmachhawn turin an inpeih. Club an neih vangin player ṭhahnem tak an chher chhuak a, hemi an tih theihna tura sum thawhtute leh club enkawltute an pawimawh hle.

Team ṭha din turin fitness chauh a tawk lo a; tawnhriat nei ṭha an mamawh. Tun hma aṭanga Chanmari veng innghahna ni ṭhin Chhinga, Achia leh MS-a ten an ho thei a, Rinchanna leh Jerry Mawia te an rawn awm chhoh bawk avangin team chhung boruak a dik nghal.

Chanmari khawtlang an ṭangrual a, pawl hrang hrang an inngaichang tawnin an football team an ngaihtuah tlang bawk. KṬP, Chanmari Branch-in Evangelical Week an hmang a, final hma zan khan ṭawngṭai tlaivarna hun an hmang. He hunah hian an ṭawngtai thupuiah champion dilna a awm.

Chanmari YMA president Lalhmangaiha chuan, "CYMA Football champion hi chu a dan a dang a, kan lawm tih bak sawi theih ka nei lo. Lammuala kan veng team ṭan tura rawn thawk chhuak zawng zawng chungah lawmthu ka sawi a, min champion puitu player leh coaching staff-te kan theih ang tawkin kan chawimawi zui ang," tiin Vanglaini a hrilh.

Chanmari hi YMA buatsaih inelnaah cricket leh basketball-ah an champion tawh, tun ṭumah football an champion leh ta bawk. Infiamna hrang hrangah Chanmari hming a langsar a, an veng hminga club an neih Chanmari FC (MPL), Chanmarians Cricket Club (MCL), Chanmari Vikings (MSL), Badminton Club Chanmari (MBL), Zothan Futsal Chanmari (MFA Futsal League), Chanmari Slammers (Aijal Club Challenger Tennis League), Chanmari Women's FC (MFA Women's League) leh  Chanmari Veteran FC (I Day Veteran Football) te hi Mizo top league-a champion inbeisei ngam vek an ni.

Share this Post