Indian sprinter Hima Das hming sawi kan bang thei rih lo, tun thla chhunga a gold medal pangana ni turin Czech Republic-a 400m intlansiakah hnehna a chang.
Inrinni zan inelnaah Hima Das hian second 52.09 chhungin a thleng a, tun season bikah chuan 400m a tlan ṭhat ber ṭum niin Asian Games 2018-a record a siam tawh chu a khum.
Kum 19 mi Hima chuan, "400m huangah a chungnung ber dinhmun luahtu ka ni leh ta, tun hnaia hetiang hlawhtlinna ka chang chho thei hi ka lawm. Kan state Assam lamah chuan tuilian vangin mi tam tak an buai mek a, ram danga ka awm chung pawh hian harsatna tuarte ka theihngheilh lo," tiin a sawi.
July 13, Inrinni khan Czech Republic-a Kladno Athletics Meet neiha 200m huangah Hima hian 23.43 second chhunga thlengin gold medal a la. July 2 leh July 8 khan Kutno Athletics Meet leh Poznan Athletics Grand Prix-ah te 200m huangah zel gold medal a lo hlawh chhuak tawh bawk a ni.
Login to comment
No Comments