Arsenal chuan season thar inbuatsaihna ṭha takin an la nei chhunzawm zel a, nimin khan Fiorentina chu 3-0 in an hneh. Hnehna an chan hnuah Gunners manager Unai Emery chuan an squad ti chak turin player pathum emaw pali lakluh a duh thu a sawi.

Bank of America Stadium-a inkhelah Arsenal tan forward Eddie Nketiah chuan goal hnih a khung bakah Joe Willock-a'n hun tawp dawnah goal hmangin an chak tih nemnghetin Italian club lamin a chhanletna an nei lo.

Gunners hian an match hmasa zawkah German champion Bayern Munich 2-1 in an hneh tawh a, Nilaini zing dar 4:30 hian Landover, Maryland-ah Spanish club lian Real Madrid nen an inhmachhawn leh bawk ang.

Arsenal manager Emery chuan player naupang an khelh ṭhat vanga a lawm thu sawiin, "Nketiah hian theihna sang tak a nei, a mamawh chu tawnhriat nei tura khelmuala hun hman tam a ni. Tun hnaiah nasa takin hma a sawn a, ani ang hian player dang pawhin hmasawn se ka duh," a ti.

Transfer bazar chungchang sawi zuiin Spanish manager chuan, "Player kan duh ṭhenkhat hi an man a to em em a, dawhthei takin kan tana ṭha ber tur kan ngaihtuah mek a ni. Player pathum emaw pali kan mamawh a, player satliah ni loin kan squad ti chhah tur ngei lak kan tum," tiin a sawi.

Player Inlan

Arsenal XI: Martinez; Chambers, Mustafi, Monreal; Jenkinson, Olayinka, Burton, Kolasinac; Nelson, Saka; Nketiah.

Subs: Leno, Maitland-Niles, Sokratis, Xhaka, Willock, Mkhitaryan, Ozil, Aubameyang, Lacazette, Macey, Martinelli, John-Jules, Medley, Thompson.

Fiorentina XI: Dragowski, Venuti, Ceccherini, Ranieri, Terzic, Castrovilli, Cristoforo, Benassi, Sottil, Saponara, Vlahovic. 

Share this Post