Inrinni zan khan MLS-a match ropui ber tia an chhal hial 'El Trafico' an khel a, Los Angeles FC leh LA Galaxy an intawng - team pahnih intawn hma hian Zlatan chu zawhna pek a ni a, "Los Angeles FC forward Carlos Vela hi top scorer a ni mek si a, nang hi MLS player ṭha ber i la ni reng em?" tih a ni. 

"Player inthlau tak kan ni. Vela hian a vanglai a hmang mek a, kum 29 mi a ni lawm ni? MLS-ah a inkhel a, a tawn san ber lai a tawng mek. Mahse, kei chu kum 29 ka nih chuan Europe-ah ka khel a, chu chuan kan inthlauhzia a pholang," a ti. 

A thusawi ang ngeiin Swedish striker ropui Zlatan Ibrahimovic-a che - hattrick a siam a, 3-2 in LA Galaxy a chakpui. Vela-a'n goal hnih a khung ve bawk a, goal khat erawh penalty aṭanga a khung a ni. Zlatan hian a ke vei lam, ding lam leh lu hmang vekin goal a khung thung. 

Ibra chuan, "League match sawi hlawh berah stadium khatin mipui an pungkhawm a, khatiangah kha chuan khelh nuam ka ti lehzual ṭhin. Vela hi ka zah em em a, mahse in tihsual lian tak chu ani nena min khaikhin kha a ni," a ti zui!

Manchester United cap­tain hlui Wayne Rooney pawhin chanchin a nei ve zel a, DC United-in 4-1 a FC Cincinnati an hnehna inkhelah DC tan goal khat a khung. 

Share this Post