GIG Motors Taekwondo Fight League champion lai Armed Veng Warriors chuan Zopa Goldsmith Chawnpui 115-98 a hnehin semifinal an lut a, tualchhung taekwondo inelna ngaihhlutah an nomawi humhum turin kawngdik an la zawh zel.

Zirtawpni zan Electric Veng YMA Hall-a inkhel kha Armed Veng tan league round an khelh zawhna a ni a, player ṭuan rang leh ke hmang thiam tak Laltlanmawia chuan a team chak puiin Fighter of the Night atan thlan a ni.

League match li an khelh chinah Warriors hian point ruk neiin table-ah pathumna dinhmun an luah nghet a, semifinal-ah chuan league round lama an ngam loh Republic Vengthlang emaw Armed Veng South an hmachhawn a ngai dawn.

Team panga inel zingah Repub­lic Vengthlang Fighters, Armed Veng South Pasalṭha leh Armed Veng Warriors ten semifinal an lut tawh. Fighters leh Pasalṭhate hi Thawhlehni zanah an intawng dawn a, legaue hmahruaitu nih inchuhna inkhel a ni ang.

St Joseph HSS, RSC Fighter leh Zopa Goldsmith Chawnpui ten a sang pali zinga tel beiseina an la nei ve ve a, anni pahnih hi Nilaini zanah intawngin semifinal lut tur zawk an chingfel ve bawk dawn a ni.

Senior team inelna a awm zanin cadet lam pawhin inelna an nei ve zel. Zirtawpni zan hian St Joseph Higher Secondary, School Ramhlun Sporting Club Fighters chuan Luangmual Taekwondo Club chu 143-119 in an hneh.

Share this Post