Pre season inelna lar Inter­national Champions Cup-ah Real Madrid-in an match hmasa ber an khel a, Bayern Munich lakah 3-1 in an tlawm. 

Bayern tan hian Corentin Tolisso, Robert Lewandowski leh Serge Gnabry ten goal khat ṭheuh an khung a, Real forward thar Rodrygo Goes chuan minute 84-naah goal khat a rawn khung ve hram. 

Real Madrid tan player thar Eden Hazard chuan a match hmasa ber a khel a, mahse Chel­sea forward hlui hian a club thar tana a match hmasa berah result duhawm a hlawh chhuak thei lo. 

Madrid khaw club tan player chanchin ngah tak Gareth Bale a inlan lo a, Zinedine Zidane chuan inkhelh zawhah a player hi hmun dang pana a chhuah tur thu a sawi zui - he thuziak i chhiar hian club zawm a nei tawh hial mai thei. 

Liam mai rawh le...

Real-in season hman zawh takah beisei an phak lo a, season khata an coach pathumna ni turin Zidane chu March khan an la let. Hetihlai hian Bale-a agent Jonathan Barnett chuan Zidane coach a ni leh ta chu an tan thil lawmawm lo a nih thu a sawi. 

Barnett chuan, "Kan tan chuan Zidane rawn kir hi chanchin lawmawm lo tak a ni. Bale nena thawhdun a duh lo a, an game duhdan a in ang lo bawk," a ti a, 2017-18 season-a inhmu thiam lo coach leh player inhriatthiam lohna a la reh lo. 

Zidane chuan, "Bale hi a chhuah vat kan beisei. Tu tan pawh a chhuah hi a ṭha zawk a, a club thar zawm tur chungchang kan buaipui mek. Mimal takin Bale hi ka haw hran lo. Mahse, a chang chuan thil thleng tur tho tho chu thlentir vat mai hi a fuh ṭhin a ni," a ti. 

French manager ṭawngkam aṭanga thlirin Bale tan Real-ah cham zel chi a ni tawh lo a, "Mimalin huatna ka nei lo," ti mah se Zidane ṭawngkam hi coach-in a player chungchang a sawi nan chuan a na hret niin a lang. 

Khawi lamah nge?

Zidane-a'n chhuak vat turin Bale a duh a, Welsh forward hian khawi club nge a pan dawn, tih chu inrinsiak theih a ni rih - Manchester United, Tottenham Hotspur, Bayern Munich leh Chinese Super League lam sawi rik a ni mek. 

Manchester United leh Bale sawi zawm an nihna a rei tawh a, indin thar leh tuma hma la mek club hian a leina tur pawisa an nei ang tih a chiang. Mahse, Bale hian Champions League khelh a duh, niin an sawi. Season hman zawh taka league-a parukna United tan thu hriat nuam a ni lo. 

Spurs-in an fapa rangkachak lak let an duh a, mahse London club hi sum tam tak senga stadium sa zo hlim an ni a, Bale hlawh a sang lutuk bawk. Welsh forward hi a club hluiah kir a duh a nih chuan a hlawh tih hniam a inhuam a ngai ang. 

Bayern Munich-in Cham­pions League an khel dawn a, pawisa an nei bawk. Hei vang hian tun dinhmunah chuan German club leh Bale hmeh rem a awl ber a, uchuak taka hlawh pekna hmun CSL a pan thut mai thei bawk - sum a tam miau a!

Bale leh a sulhnu

Kum 2013 khan Bale hian pound maktaduai 85-in Real Madrid a zawm a, hetihlai hian khawvela player manto ber a ni. Mahse, hliam vangin a buai reng a, tun hnai season li chhungin league match 79 chiah a khel. 

Bale hian kum ruk chhungin match 231 a khel hman a, goal 102 ngawt a khung tho - Champions League (4), La Liga (1), Copa del Rey (1), Spanish Super Cup (1), UEFA Super Cup (3) leh FIFA Club World Cup (3)-ah te a champion. 

Kum 30 mi forward hian Real a pan kum kha a mimala season a hman ṭhat ber a ni a, match 44-ah goal 22 a khung. Season hman zawh takah khan match 42 khelin goal 14 a khung a, match 21 hi bench aṭangin a lut. 

Zidane chuan, "Thutlukna ka siam a ṭul a, player leh coach-in mawh kan phur ve ve. Hun rei loteah Bale dinhmun a chiang dawn a, tu tan pawh chu chu a ṭha a ni," a ti zui. 

Share this Post