Aizawl District Basketball Association buatsaih Zalena Fanai Memorial Trophy 'ADBBA Cup'-ah Republic VR4 chuan Zirtawpni zan khan Mission Vengthlang Hollow BBSP chu final-ah 82-74 in an hneh a, an champion. Hmeichhe inelnaah Team Alpha chuan LB Associates Bungkawn 44-34 a hnehin an champion ve bawk.

Chawnpui Sports Centre-a inkhelah hian Republic VR4-in bul an ṭan ṭha a, 23-16 in first quarter-ah an chungnung nghal. Second quarter-ah Hollow  an rawn che ṭha a, halftime-ah 40-33 in hma an hruai ta zawk. Second half-ah VR4 rawn tho chhuakin 82-74 in hnehna an chang. VR4 tan hian Lalremruata (Abeua) chuan 40 pts zet neiin an champion-na kawngah hian a pawimawh hle.

VR4 hi kum 2003 March thla khan basketball tui ṭhian hoin an unau thi ta - Vanlalzuia (Tlanmawia u), Ramdina (Darliansanga u), Ramliana (R. Lalmuanpuia u), Rosangpuia (Vanlalhluta u) leh Rorelkimi (Vanlalruata u) te hming chawiin an din. An din tirh hian tualchhung inelnaah a zawnin vawi thum an champion a, hemi hnu hian team ṭha pawl an ni thei rengin Mizorama basketball inelna sang ber Mizoram Super League pawh an khel tawh a ni.

Club secretary Davy Lalruatliana chuan, "Player-te leh coaching staff-te thawhrimnaah club hruaitute kan lawm a. An harsatna sut kian nana nasa taka lo ṭawiawm ṭhintu an chhungte hnenah kan lawm takzet bawk. MSL khelh leh ngei kan duh a, chumi tur chuan theihtawp kan chhuah ang," tiin Vanglaini 

a hrilh.

Share this Post