Serie A club Inter Milan chuan Romelu Lukaku lak tumin Manchester United chu pound maktaduai 53.9-in an dawr a, English club-in an hnawl.

Lukaku hi Inrinni zana United leh Inter Milan inkhelh ṭumin a inlan lo a, Ole Gunnar Solskjaer hote hi Singapore-a inkhelah hian kum 17 mi Mason Greenwood-a goal hmangin 1-0 in an chak.

Inter Milan manager Antonio Conte chuan, "Amah hi kan team tichak thei turah ka ngai. Thlirna chi hnih a awm a, ka thlirna aṭang chuan lak ka duh a, ka beisei bawk. Thlirna dang zawk erawh club kutah a innghat," tiin a sawi.

Italian manager  chuan, "Tunah rih chuan Manchester United player a ni a, Romelu chungchang hi ka sawi chiam a rem lo," tiin inkhelh banah a sawi a, United nen an inkhelh hma hian Chelsea manager a nih laia lak a tum thu a sawi tawh bawk.

Manchester United hian kum hnih liam ta khan kum 26 mi Lukaku hi Everton aṭangin pound maktaduai 75 in an lei a, hemi aia toa dawrtu a hmuh chuan Belgian striker hi an chhuah mai a rinawm. Chutihrualin an beisei zat anga ngamtu an awm lo a nih chuan lawm takin an chelh thung ang.

Solskjaer-a hote hian July 25, Ningani hian Tottenham Hotspur nen Hongkou Football Stadium-ah friendly match an khel leh ang. Tun dinhmunah United tan Mason Greenwood a la langsar hle.

Norwegian manager Solskjaer chuan, "Mason hi tun ang zela a khelh chuan August 11-a Chelsea nen Old Trafford-a kan inhmachhawn hunah bul ṭan tur thei zingah a tel," tiin Premier League match hmasa bera bul 

ṭan tura a rintawk thu a sawi a, Inter Milan nena goal a khung leh takah chuan Greenwood hian bul a ṭan a nih pawhin a 

mak lo ang.

Share this Post