Algeria-in Africa Cup of Nations final-a ball an chan zat chu 38% a ni a, shot an neih zat chu pakhat a ni a, AFCON champion chu Algeria an ni!

Zirtawpni zan khan AFCON final khelh a ni a, Algeria hian an shot neihchhun hmanga goal khungin Senegal chu 1-0 in an hneh.

Kum 1990-a an champion hnuah a vawi khat nan Algeria an champion ve leh ta a, Senegal-in a vawi khat nana AFCON nomawi chawi an tumna erawh a thamral thung. 

Senegal hian kum 2002 khan AFCON final an lo khel ve tawh a, mahse a tlawm zawkah an ṭang. Sadio Mane hoin thawnthu thar ziah tum viau mah se an vanduai a, Algeria champion lai an thlir. 

Algeria vanneihna

Inkhel ṭan aṭanga minute hnihna lekah Algeria-in goal an khung nghal a, Baghdad Bounedjah-a shot satliah tak nia lang chu defender Salif Sane chuan a lo dang per a, a goal!

Senegal match hmasa berah Sane hi a inlan a, mahse a inhliam zui avangin a hmel a lan leh tawh lo. Defender pawimawh Kalidou Koulibaly hrem a nih avangin final-ah Sane a inlan leh a, mahse an goal chhuah chhana mawhphurtu a ni zui. 

M'Baye Niang chuan Senegal tan vawi hnih ngawt chance duhawm a nei a, cross bar chung chiahah a chance hmasa zawk hi a pet. AC Milan striker hlui hian keeper Rais M'bolhi a hel hnuah a pet out bawk. 

Algeria keeper M'bolhi-a che ṭha a, Youssouf Sabaly shot ṭha tak chu bar chung lamah a nam chhuak hman - Bordeaux defender Sabaly tan a uiawm vawng vawng ang. 

Vanduaina kaltluang

Algeria-in shot dang nei tawh lo mah se an goal an venghim miau a, goal khat an neih chu champion nan a tawk. Senegal tan erawh vanduai a kaltluang emaw tih mai tur a ni a, goal an zawng hmu thei lo. 

Hei mai a ni lo, Senegal winger Ismaila Sarr-a ball cross chuan Adlene Guedioura a 'ban' a per fuh a, referee-in penalty a pe. Senegal fan-te an lawm viau laiin referee-in video assistant rawn turin thutlukna a siam zui. 

VAR aṭanga ennawn hnuah referee-in a penalty pek tawh a sut a, Senegal an vanduai chhunzawm - replay enin ball hian Nottingham Forest midfielder Guedioura kut a fuh ngei tih a lang a, mahse a taksaah a kut a beh avangin penalty tur a ni lo. 

Algeria-in goal an khung hnua defensive game an khelh avangin an chhuanvawr Riyad Mahrez tan lansarhna hun a awm lo a, Senegal tan Mane chu eng ruai a ni bik lo. Liverpool forward hi ball a khawih apiangin auh el a ni a, mahse amah au eltu Algeria fan-te chhanglet turin goal a nei thei tlat lo. 

Coach pahnih titi

Zirtawpni zana AFCON final-in danglamna tak pakhat a nei a, chu chu ram pahnih coach-te kha an ram mi ve ve an ni. Algeria enkawltu Djamel Belmadi kha Manchester City leh Southampton tan pawha lo khel tawh a ni a, Algeria tana vawi 20 inlan tawh a ni. 

Kum 43 mi Algerian coach chuan, "Player-te tel lo chuan engmah ka ni lo. Coaching staff-te hian player-te chu kawng kan kawhhmuh a ni mai a, kan ruahman ang taka ṭhain an khel chhuak tlat a ni," a ti a, an champion chhan chu player-te vang a nih thu a sawi. 

Senegal coach Aliou Cisse chu World Cup 2002-a Senegal-in quarterfinal an luh ṭuma captain a ni a, Birmingham City leh Portsmouth tan pawh a khel tawh. Kum 2015 aṭang khan Senegal a enkawl ṭan. 

Algeria coach Belmadi nen 1976-ah ve ve an piang a, Cisse hi March 24-ah piangin Belmadi erawh March 25-ah a piang thung - ni khatin Cisse a upa zawk.

Share this Post