Arunachal Pradesh sorkar chuan Myanmar ramri bula awm, Vijaynagar khua kal pawhna tur kawngpui; Miao khua aṭanga siam mek chhun­zawmna atan  Rural Work Depart­ment (RWD) hnenah cheng vaibelchhe 39 a pek belh.

 AP deputy chief minister, Chowna Mein chuan Thawhlehni khan secretariat office-ah RWD minister, Honchun Ngandam leh RWD chief engineer cum PMGSY CEO,  D Nyodu-te nen meeting an nei a Miao-Vijaynagar kawngpui siam mek report a ngaihthlak hnuah RWD chu a rang lama kawngpui siam hnathawh zo vat turin a hrilh. 

Vijaynagar khua hi Myan­­mar ramri hnaih takah a awm a, sorkar chuan he khua kalpawhna tur siam hi a ngai­pawimawh hle. India ram lamah chuan Vijaynagar hnaih bertu chu Miao khua hi a ni a, Miao aṭang hian Vijaynagar hi km 157-a hla a ni. 

Kawngpui siam hna thawk mektu RWD chuan kawng laih tur, tuiluankawr siam leh lei dawh ngaite ala awm vangin sorkarah sum an dil belh a, cheng vaibelchhe 39 an pek belh ta a ni. Mein chuan sum chu dik taka hmang tur leh hun tiam chhunga hna zo turin a hriattir nghal.

RWD minister, Honchun Ngandam chuan kawngpui sialna hmuna leilung awmdan danglam vang leh sanction tla hniam vangin sum hi an dil belh tih a sawi. RWD chief engineer cum PMGSY CEO,  D Nyodu pawhin ruahsur, forest regulation leh thil dang vangtea harsatna an tawhte deputy chief minister, Chowna Mein a hrilh ve bawk.

Share this Post