Supreme Court chuan Thawh­lehni khan National Register of Citizenship (NRC) deadline atana July 31 hun a tuksak chu thla khat dang a pawhsei sak leh a, August 31 thleng hun a pek belh.

Assam NRC coordinator, Prateek Hajela chuan SC hnenah hian dilna thlenin, tuilian avangin an state chuan hna an thawk thei lo tih a sawi. Hajela ngenna hi ngaihtuah a nih hnuah chief justice Ranjan Gogoi leh justice Rohinton F Nariman-te kaihhruai bench chuan August 31 thleng atana pawhsei sak an nih thu hi a sawi a ni.

NRC hnuaiah hian ramdang mi March 24, 1971 hma lama India rama rawn lutte chu khua leh tui anga chhiar an ni thei dawn a, hemi hnu lama rawn lutte erawh chu ramchhung chhuahsan tura tih an ni thung ang.

Assam NRC hi SC enpuina hnuaia kalpui a ni a, December 31, 2017-ah leh nikum July 30 khan draft list tihchhuah a ni tawh a; hetah hian mi tam tak, NRC dil si hming tel lo an awm a ni.

July 30-a draft list tihchhuahah khan hming 28,963,877 telh a nih laiin mi nuai 40 chuang zet paih an ni thung.

Sample 20% enfiah phalsak lo

Supreme Court hian NRC deadline pawhsei hi remti mah se state leh sorkar laipuiin sample atana 20% enfiah a dilna erawh a hnawlsak thung.

Judge-te chuan NRC draft list enfiah leh chu a ṭulna an hre lo tih sawiin, tuna hnathawh mek danah chuan an lungawi tawk hle tih an sawi.

Bench chuan sorkar laipuiin tihpalh thil thua list-a tel lo tur telh palh emaw paih palh emaw a awm theih avanga sample enfiah leh a dilna chu an chhinchhiah thu sawiin, 27% lai chu an enfiah leh tawh zawk tih a sawi a ni. NRC coordinator-in kar liam taa mi nuai 80 enfiah leh an nih tawh thu a sawi chu behchhanah bench hian a hmang.

Hetihlai hian Thawhlehni khan sorkar laipui aiawha inlan attorney general KK Venugopal chuan SC hnenah hian NRC chu tlangzarh a nih hmain enfiah leh a ṭul hle tih a sawi a, dan loa ramchhunga awm hming eng emaw zat a tel thu a sawi. 

Share this Post